Recesion economico mundial… Y kico ta haci pa limita daño…

E señalnan global di recesion economico no ta limita na algun pais so. Bao influencia di e guera na Ucrania e situacion preocupante den mercado di petroleo y gas tin consecuencia na henter mundo, tambe den otro sector. Mientras e aliadonan di Ucrania, principalmente e paisnan Europeo y Norteamericano, ta tuma medida pa sanciona Rusia, e medidanan ey tin consecuencia pa nan economia tambe. Nos partner economico principal, Merca, ta den problema grandi, cu un economia cu ta depende hopi di consumo interno, y ta mira por ehemplo varios cadena grandi di distribucion di producto na e poblacion den problema serio cu por termina den bancarota. Tambe agencia di noticia economico Bloomberg ta señala cu den ultimo simannan ya ta mira un aumento drastico di e cantidad di persona desemplea cu a solicita beneficio. Den ultimo dos siman di maart a registra alrededor di 10 miyon solicitud pa motibo di desempleo.

Loke nos ta mira nos dilanti ta un crisis nobo, di 2022 cu no tin relacion cu e anterior di Covid-19, pero por significa consecuencia grandi pa nos tambe. Un promer señal ta e aumento enorme di prijs di combustible, loke tin un efecto inmediato riba entrada di tur consumidor, sea nan ta propietario di un vehiculo of no. Esnan cu ta depende di transporte publico tambe lo sinti e aumento di prijs cu indudablemente lo bin na cierto momento. Mientras en general lo por pensa riba e alternativa pa gobierno amplia e subsidio na transporte publico, esey den e circunstancianan actual ta hopi dificil. Manera gobierno a anuncia, a discuti caba cu CAft pa haci algo cu e tarifanan di accijns riba combustible, pero e contesta tabata negativo, pasobra esaki ta hiba na perdida di entrada den un situacion unda ya gobierno tin un deficit dii casi 230 miyon florin e aña aki.

Y tin mas na caminda. Lo bin un aumento drastico di practicamente tur cos, principalmente prijs di cuminda. Aki atrobe cualkier medida cu gobierno kier tuma tin como consecuencia perdida di entrada, mientras no ta asina facil pa fia mas. Gobierno di Aruba a acorda cu Hulanda cu pa e aña aki tur prestamo, local o den exterior, mester di previo aprobacion di Den Haag. Awor, si gobierno ta haya cu den e situacion actual ta hustifica pa fia mas, no mester keha cu CAft a conseha negativo. Al fin y al cabo, CAft ta solamente e consehero y lo mester dirigi e pregunta na e amo, cu ta gobierno Hulandes/di Reino. E probabilidad cu ta logra algo ey ta chikito, pero no por murmura sin haci e intento.

Ademas, ta importante pa tene e canalnan di comunicacion cu Hulanda, pasobra tin varios cos importante pa regla. Un di nan ta e introduccion di e BTW, unda te awe gobierno no a duna nada mas di conoce cu ta algun linea general. Tempo ta birando cortico pa aproba y introduci esaki na tempo, y nos no ta convenci cu gobierno tin pura pa termina e trabao preparatorio. Esaki pasobra si ta insisti den aprobacion y introduccion di BTW pa 1 di januari 2022, lo mester contesta algun pregunta importante. Entre otro e pregunta con ta bay haci un asalto riba cartera di e consumidor, garando hopi mas cu ta necesario pa yega na un BTW cu ta ‘budget neutraal’, es decir trece mes hopi aden cu BBO tabata haci na por ehemplo 2019. Si e temornan di e recesion internacional bira realidad, ta inimaginable cu ta bay haci mas daño ainda cu un impuesto nobo cu ta reemplaza BBO, pero ta gara como Afl. 160 miyon mas for di e consumidor. Por cierto cu den e comentario di CAft riba presupuesto 2022 aproba, a manda puntra tambe si gobierno por splica di unda a sali e suma aki. Publicamente en todo caso nos no por a mira o tende di un contesta di gobierno.

Pa nos comprende otro bon, e problema no ta e introduccion di e BTW mes; e lo ta un avance pa nos sistema fiscal. Loke ta cuestiona ta pakico e mester ta na un porcentahe asina halto cu e ta bay trece tanto placa extra aden. Y esaki ademas den un situacion unda gobierno ta nenga redondamente di baha gasto, ni e aña aki, ni den e proximo añanan, segun nan propio proyeccion den e presupuesto multi-anual cu nan mester a presenta na Hulanda y CAft, pero no na pueblo aki mes. A proposito, e asunto di no kier baha gasto ta loke ta impedi gobierno pa logra algo na Den Haag, si nan kier bin cu medida pa limita daño di e recesion pa e consumidor local, sigur na esnan di menos recurso. Nan ta esunnan cu ta dedica un parti mas grandi di nan entrada na articulo di promer necesidad y ademas no tin e reserva financiero cu un persona cu entrada mas halto si por tin.

Loke nos ta mira ta sucediendo ta cu e crisis nobo aki a bin stroba e plannan di gobierno pa introduci un BTW cu ta duna tanto beneficio extra, cu nan por a continua riba mesun pia, repartiendo beneficio na nan hendenan y asina preparando pa proximo eleccion cu en todo caso un base solidario di esnan cu ta apoya e gobierno aki. Awor tin mil y un pregunta distinto pa contesta, nos lo ta pendiente.