Segun Departamento di Salud Publico (DESPA), nan a ricibi diferente yamada di cuidadanonan preocupa riba informacion cu webo procedente di Merca ta wordo recolecta (recalled) pa motibo di ta infecta cu Salmonella.
E departamento ta aclaria esaki.
Segun un comunicado di DESPA, nan seccion Dienst Warenkeuring en Hygiëne ta ricibi diariamente informacion for di Food & Drug administration (FDA). Pa loke ta e caso specifico aki di webonan contamina, esakinan no a yega Aruba.
“Tur compania na Merca cu ta produci productonan tin pa registra cada produccion bou di un number cu ta yama ‘plant number’ y den e caso aki di e webonan e plant number ta P-1065. Por medio di e number aki por sa exactamente na unda e producto ta of con leu el a yega y ta haci e proceso pa recolecta un producto of produccion uno hopi mas facil y eficiente.”
E departamento ta sigui bisa cu pa medio di e informacion aki nan ta spera di a informa comunidad debidamente riba e situacion aki y lo sigui monitoria tur loke ta alimentacion pa consumidornan.
Pa mas informacion por contact Dienst Warenkeuring en Hygiëne na 522-4200.
