Rebeldenan indigena Zapatista na Mexico a anuncia cu ta extendiendo nan control riba e asina yama zona ‘autonomo’ na mas di 11 area den estado sureño di Chiapas.
E Zapatistanan no ta sconde nan disgusto cu presidente Andres Manuel Lopez Obrador, pero ora e puntra e Presidente tocante e anuncio dialuna, Lopez Obrador a bisa cu e expansion ta ‘bon bini’.
“Dal bay numa, pasobra esey ta nifica traha pa beneficio di e aldeanan y e pueblo”, Lopez Obrador a bisa. “Lo unico cu nos no kier ta violencia.”
Un declaracion firma di e ‘subcomandante’ Zapatista, Moises, den weekend a referi na e accion como ‘un crecemento exponencial cu ta permiti nos kibra e blokeo un biaha mas’.
Pero algun di e zonanan autonomo nobo probablemente lo ta controversial. Algun ta riba tereno cu e Zapatistanan a tuma despues cu nan a organisa un accion arma cortico na 1994, pa exigi mas derecho pa e poblacion indigena. Pero sikiera un di e pueblonan ‘autonomo’ nobo di e rebeldenan, Nuevo Jerusalen, ta situa den e jungla ecologicamente sensibel di Lacandon, un reserva natural.
Den pasado, e Zapatistanan a sugeri cu comunidadnan indigena lo establece nan propio reservanan, unda naturalesa y agricultura por coexisti. Pero expertonan ta bisa cu agricultura di kima tereno, ganado y terenonan fini di jungla ta haci casi imposibel pa tin tanto vivienda como conservacion.
Generalmente e Zapatistanan ta prohibi agencianan di cumplimento di ley y inspectornan di gobierno di drenta nan comunidad, y ta practica formanan tradicional di auto- gobernacion. Tambe nan a establece nan propio sistema di educacion.
Sikiera desde 2006, e liderazgo di e Zapatistanan publicamente y frecuentemente a insulta Lopez Obrador. E declaracion publica diasabra no tabata un excepcion: e Zapatistanan a yama e presidente ‘e supervisor nobo’, y a bisa cu decenas di activista indigena a ser asesina desde cu el a tuma mando dia 1 di december.
