Caso Avestruz ta e caso mas grandi di corupcion di tereno na Aruba. Un total di 11 sospechoso ta wordo acusa den e caso caminda e sospechoso principal ta ex-minister y actual parlamentario Sr. Oslin “Benny” Sevinger.
Cu e articulo aki, Bon Dia Aruba ta conclui un serie cu a detaya un biografia chikito di cada sospechoso pa asina pueblo di Aruba por conoce e sospechosonan aki un poco mas y kico ta e acusacionnan contra e sospechosonan aki.
Rebecca Richardson
Richardson ta yiu di otro sospechoso den caso Avestruz, kende tambe ta un conocido campañado di partido AVP, Sra. Leoncita Arends. Richardson tabata e prome persona deteni relaciona cu e caso Avestruz, unda cu e sospechoso principal ta Oslin “Benny” Sevinger.
Caso Avestruz
Richardson ta wordo acusa di falsificacion, estafa y soborno di ambtenaar y ta sospecha di a haci esaki entre januari 2014 te december 2017. El a keda deteni dia 11 di april 2021 na Aeropuerto Internacional Reina Beatrix y despues di algun dia a wordo laga den libertad. Ta sospecha cu Richardson a ricibi tereno comercial ilegalmente.
