Diamars anochi, den presencia di Gobernador di Aruba, Alfonso Boekhoudt a tuma luga e reapertura di Museo Arkeologico Nacional Aruba (MANA), despues di a permanece cera pa casi cuater aña.

Ademas tabata presente nos Prome Minister Evelyn Wever-Croes, Minister Xiomara Ruiz-Maduro, Minister Andin Bikker y minister Rudy Lampe, ademas di algun miembronan di nos parlamento. Den e ceremonia aki a haci un presentacion teatral di John Freddy Montoya su obra ‘Redescubri’, cu a hala atencion di e publico presente.

E mandatario kende ta encarga cu e cartera di cultura a bisa cu for di cu el a asumi e funcion aki, un pregunta comun cu e tabata haya tur ora ta: Ki dia ta bolbe habri e museo aki?

E ta un pregunta cu di un banda tabata caus’e tristesa, ya cu e museo tabata cera pa hopi aña. Esaki debi cu e museo, pero tambe su edificio monumental no a haya a atencion y mantencion debido.

Pero di otro banda, e echo cu tantisimo hende tabata puntra riba reapertura di e museo, tabata haci’e contento. Pasobra e ta un refleho cu e museo aki ta uno hopi keri, importante y tambe a haci tanto falta den comunidad. No solamente pa nos hendenan local, pero principalmente pa e turistanan tambe. E interes aki a mustra e importancia di Museo Arkeologico Aruba pa e herencia cultural arkeologico di nos pais.

Na inicio di su discurso, Ruiz-Maduro a bay un poco den historia riba desaroyo arkeologico di Aruba cu ta data for di e prome excavacion arkeologico haci riba nos isla na aña 1880.

El a recorda cu unabes cu MANA a habri su porta den e edificio monumental actual, a pone como metanan principal e parti di investigacion, presentacion, promocion, maneho y conservacion di Aruba su herencia arkeologico. Pero principalmente conscientisa y educa nos comunidad riba importancia di nos herencia arkeologico pa medio di un team di profesionalnan Arubiano.

Director di MANA.
Director interino di MANA, Pancho Geerman, su discurso di reapertura di MANA tabata mas academico riba historia di humanidad di Caribe y di Aruba.

El a menciona cu den e proceso aki e islanan chikito manera Aruba tabata un trampolin entre e colonisado Spaño y continente Sur Americano. Tambe investigacion arkeologico den Caribe ta confirma cu den siglonan 15,16 y 17 actividadnan comercial a sigui entre e islanan.

El a bisa cu te hasta tin hallazgo di obhetonan cu ta muestra e influencia Europeo y AmerIndio. Igualmente cuminsando siglo 16, e colonisacion Europeo y e fluho di hendenan Africano cu a bin como catibo a conduci na mestisahe. Tambe e habitantenan nativo a incorpora e personanan sclavisa cu a huy, creando identidad nobo y productonan material nobo.

Geerman a bisa cu e proceso di mestisahe y creacion ta sigui te dia di awe, y e ta contribui na sociedad cultural multi-etnico den Caribe.