Manera Bon Dia ya a trece awe mainta e refineria na San Nicolas lo habri bek. Awor mester finalisa e documentonan y nan tambe lo bay parlamento pa aprobacion. Esaki lo tuma mas o menos un siman, segun gobierno. Prome di augustus e start up mester cuminsa, pero pa yega na e capacidad maximo di 209.000 bari pa dia, esaki lo tuma por lo menos 2 aña. Sinembargo ya den e fase di preperacionnan cu ta cuminsa momento e papelnan ta firma y parlamento a aproba, lo mester trahadonan.
Minister Mike de Meza ta bisa cu riba e piek siguramente lo mester tin di hasta 2 pa 4 mil trahado. Pa despues lo stabilisa na un 600 hende trahando den e refineria y mas cu mil hende trahando riba contract. Pues ta cuponan di trabou direct y indirect cu e apertura lo crea.
E Citgo desk ta encarga cu e intermediacion di trabou y tambe esunnen pafo di Aruba por cuminsa haci peticion.
Minister di Labor, Paul Croes, ta bisa cu na prome instante lo yena e cuponan di trabou cu Rubianonan. Pero esey no ta suficiente, y mester di hende di afo tambe. E ta pensa cu 600 pa 700 cupo lo wordo yena local y e resto cu hende di afo.
Economia
E suma di inversion di banda di Citgo no ta sigur ainda, pero riba ‘papel’, ta papia di 1 biyon dollar. Pero segun e minister awor ta estima un suma di 700 miyon dollar bay ariba. Citgo, subsidario di e compania Venezolano PDVSA, lo bay huur (lease) e refineria pa 15 aña cu un opcion di extende e periodo aki cu 10 aña mas.
Pa cu nos economia e mandatario ta pensa cu e reapertura lo stimula nos economia cu un 12 pa 15% GDP, un entrada anual di mas cu 600 miyon florin. Gobierno mes lo premira di haya un 100 pa 125 miyon florin por medio di impuesto.
Gobierno como doño di refineria
Pa clarifica: gobierno lo bira doño di refineria. Pues e lo tuma over e planta di Valero. Pa opera esaki, gobierno lo lanta dos compania estatal; uno pa opera e planta y e otro pa bende combustibel local y haci mercadeo.
Gas
E refineria lo no draai mas riba azeta pa su produccion. E deal ta cu lo uza gas for di Venezuela. Asina gobierno kier baha e polucion, siguramente den aire. Segun minister De Meza (tambe responsabel pa Medio Ambiente) cu gas lo baha emision di CO2 cu mas cu 20%. E plan ora e refineria ta den operacion lo uza e resto di e CO2 pa cultiva algen.
Medio ambiente
E reglanan pa proteha medio ambiente ta mas stricto cu anterior, e mandatario tambe ta bisa. Pues pa evita derame, manera den pasado. “Awor cu gas esaki mester ta hopi bon regla.” Ora a puntra cu kico lo mara Citgo pasobra Aruba ainda no tin un ley di medio ambiente, minister De Meza ta contesta: “E ley ta bin pronto, pero den e contract ya nos a pone hopi reglanan cu ta den e liña di e ley y tambe otronan cu ta mas stricto cu a haci cu otro refineria den pasado.”
