Citgo a saca un comunicado cu no ta Citgo di Merca a cera e deal, pero ta Citgo Aruba. E pregunta dibiaha ta bin ariba, ken ta Citgo Aruba? Ta gobierno di Aruba ta aden of un tercera persona ta aden? Si ta gobierno di Aruba esaki kemen a sera un deal cu nan mes? Esaki segun Parlamentario Xiomara Ruiz Maduro ta pregunta nan cu ta bini dilanti.
”Ta bisa na largo tempo cu mester a bay Houston pasobra ta na Houston combersacion nan ta tuma luga, pero awo ora bo wak cu e deal a wordo cera na Venezuela, anto cu e hende nan di Citgo a sali bisa cu e cos no ta cu nan, anto e ora ey bo ta puntra bo mes ta cu ken Aruba a firma anto y kico nan a firma?” sra. Maduro ta bisa.
No a bini Parlamento prome
Parlamentario Xiomara Ruiz Maduro ta splica Bon Dia cu gobierno no a bini parlamento prome manera cu ta usual den caso di apertura di un refineria y vooral e biaha aki cu Aruba ta bay tuma over e refineria for di Valero anto lease esaki.
”Esey ta un transaccion como pais cu ta hopi grandi anto tipo di cosnan asina, wak, berdad gobierno ta esun cu ta ehecuta y tin e libertad ey tambe, pero tin cosnan ora cu nan ta di e tamaño eynan cu consecuencia nan pa e pais, bo tin cu bini parlamento pa bo haya sikiera e ”gevoelen” manera nan ta bisa na Hulandes, for di parlamento ariba kico bo ta bay haci” sra. Maduro ta conta Bon Dia.
Segun Presidente di Parlamento sra. Marisol Lopez Tromp den un post reciente riba Facebook, ”Parlamento di Aruba no a haya informacion di e contenido di e acuerdo (nan) ainda y tampoco e documentonan relevante pa asina tur Parlamentario por ta debidamente informa y pa por prepara nan mes pa trata e topico den staten.” Pesey, segun sra. Tromp , a haci un peticion na Gobierno riba 17 di Juni 2016 pa haci entrega di e documento nan na Staten.
