Logico cu tur atencion ta bay na loke ta parce e logro grandi di gobierno pa eleccion 2017: e reapertura di e refineria. Gobierno ta den estado di euforia ainda, dunando ‘informacion’ tur caminda menos unda nan mester haci esey: den parlamento. Mientras tanto sin embargo, tin varios otro asunto cu na e momentonan aki no ta haya atencion. Nos ta practicamente na mita di aña y no tin un bista ainda kico ta haci pa mehora condicion pa empresanan prospera miho. Ministro encarga cu finanzas a trece un plan pa haci cambio bastante drastico den nos sistema fiscal cu tabatin e merito di intenta mehora e clima empresarial. Pa motibonan puramente politico a mata e plan aki: tabata imposibel pa Mike Eman bay conta pueblo cu un ABB di 7 – 8% lo ta mas conveniente cu e BBO/BAZV actual di 3,5%. Su desaparicion talbes no ta di lamenta, pero e problema ta keda cu no a bin nada na su luga. Naturalmente gobierno lo argumenta cu no ta necesario haci algo den e sentido aki, pasobra cu reapertura di e refineria supuestamente Aruba su economia lo haya asina un boost, cu haci algo pa e otro sectornan no ta parce necesario. Pero clima di inversion no ta drecha asina y no ta tur hende tin negoshi na San Nicolas.
Pero tin mas problema cu ta pidi atencion. Nos ta papia anto por ehemplo di e deterioro den ayudo social y na gruponan specifico, manera e institucionnan cu ta combati abuso di droga. Tur ta sintiendo e cortamento den nan subsidio cu nan tabata haya. Ta den enseñanza unda e necesidadnan ta hopi grandi. No por kita rason di ministro di e cartera aki ora e ta mustra riba e estado deplorabel di mayoria di e scolnan. Un man yen a keda drecha caba y algun ta na caminda, pero e mayoria grandi ta exigi mesun trato y ta bay costa centenares di miyones cu nos no tin. Y ainda nos no a ni toca e problema di contenido y calidad di enseñanza cu ta un di e menasanan grandi pa nos futuro economico, pasobra enseñanza ta manera un barco sin rumbo.
Tambe ta urgente haci algo den ministerio de Husticia unda nos mester cuida e presonan cu tin na un manera cu ta cuadra cu normanan internacional riba e tereno aki. Ta p’esey ta mas incomprendibel ainda cu pa e aña aki e ministro encarga a bay di acuerdo cu un reduccion di su presupuesto, en bes di mustra kico e ta haci pa mehora situacion.
Pero riba tur e diferente terenonan aki no ta trata so di recurso financiero cu t’ey o no t’ey. Ta trata primordialmente di e falta di vision di kico mester bay sucede den e añanan nos dilanti pa nos por mira un desaroyo positivo riba e diferente terenonan aki. Uno hopi importante cu ta keda for di bista mas tanto ta e problematica di vivienda. Aruba ta creciendo den poblacion, nos a surpasa 110.000 habitante caba, si nos por kere e cifranan cu ta sali ultimamente. Pero nos no ta mira un crecemento asina fuerte den construccion di vivienda cu ta mantene paso cu esaki. Y pakico no? Pasobra ta un grupo masha chikito cu tin peticion entrega pa tereno erfpacht, efectivamente ta haya un tereno pa traha cas. E tempo cu gobierno por a emiti mil tereno pa aña ta leu nos tras; nan no ta ni disponibel mas. Pero tambe mester tene cuenta cu un grupo creciente di nos poblacion no ta cay den un categoria di salario, ni como pareha, pa yega na e minimo pa por traha of cumpra un cas, ni den e categoria di mas humilde mes. Cu un salario di algo mas di 4000 florin pa luna un pareha cu dos yiu por sobrevivi, pero no por yega na un cas di nan mes. Y como cu ta hopi aña pasa cu gobierno a haci algo pa vivienda popular, nos tin un generacion di mucha y hoben cu ta lanta den apartamento, pasobra esey ta loke tin…
E situacion aki ta sclama pa un contesta di esnan cu ta dirigi e pais aki. Pretende cu tur hende den e pais aki ta di cinco strea, y cu tur cos ta di cinco strea, no ta yuda pa mantene un bista realistico riba nos comunidad y su necesidadnan. Si hasta ta asina cu esnan cu un cartera un poco mas diki, di baina por haya tereno pa construi nan mes vivienda, logicamente e contesta unda tur e otronan mester biba ta den man di esnan cu ta goberna o ta aspira bay goberna otro aña. Ta inevitabel cu den e campaña electoral venidero, cu ta parce di a cuminsa caba, e tipo di asunto aki lo mester haya amplio espacio, en bes di gritamento bashi tocante ‘green’ y ‘sostenible’, mientras e profetanan di e futuro ‘glorioso’ aki no tin contesta pa sikiera un di e problemanan aki. Si campaña a cuminsa caba, nos ta cuminsa e debate awor mes.
