Diabierna den oranan di marduga, Tweede Kamer a aproba e concepto di ley di ‘Areglo di Disputa pa Reino Hulandes (Koninkrijk Gechillenregeling)’ di secretario di Estado pa Asuntonan di Reino, Raymond Knops. Pa dos dia Parlamento di Hulanda, cu contribucion di miembronan di Staten di Aruba y Corsou, a debati riba e proposicion cu Knops a bin cu un Areglo di Disputa.
Durante e debate, diferente amienda a keda entrega. Un di e amiendanan tabata di Presidente di Parlamento di Aruba, Ady Thijsen. Ta trata e amienda Thijsen cu ta institui cu e ‘Afdeling Advisering’ di Raad van State mester cambia pa ‘Afdeling Koninkrijksgeschillen’ cu a keda aproba. E ‘Afdeling’ aki mester wordo crea si door di cambio di ley Raad van State (WRvS).
Minister Plenipotenciario, Guillfred Besaril a asisti na tur dos dia di debate y ta duna e siguiente comentario: “Mi no por bisa cu mi ta contento cu e ley, pa motibo cu e paisnan Hulandes Caribeño tabata kier un contenido diferente na loke a keda aproba diabierna marduga. Mi por ta satisfecho si cu e delegacionnan di e diferente paisnan, incluso Hulanda comokiera cu tur a pone di nan parti pa awe tin algo riba mesa. Mi tabata enfatico na un y tur cu despues di 10 aña di ta agenda e tema y discuti, a yega ora pa tuma un decision. Awor ta keda na Eerste Kamer na vocifera su mes y mira kico e practica di e ley aki lo trece cune den futuro.” Besaril a termina.
Potret cortesia di Cas di Aruba
