Mi a tuma nota di e relato publico di Associacion di Gasoline Stations di Aruba, fecha 8 di juli 2022. Aki ta informa cu entrante 13 di juli 2022 nan no lo ricibi pago mas pa medio di tarheta di Maestro / Debito di banco.
Esaki ta un situacion lamentabel, mirando desaroyonan internacional di prijs di crudo, y e hecho cu ainda Aruba su economia ta den proceso di recuperacion, y tambe e hecho cu nos ta purbando di stimula mas digitalisacion dentro nos economia, cual ta encera mas pago online y menos cash, cual ta mas safe.
Dialuna binidero mi tin un reunion cu Aruba Bankers Association (“ABA”), y tambe ta buscando un reunion cu AGDA pa asina tambe scucha di nan banda.
Nos mester keda realistico cu e realidad pa cual cu e margin di ganashi di gasoline stations ta fiho y regula pa ley, pa cual nan no tin manera pa desvia for di esaki ora ta yega na por ehempel cambia prijs. Tur subida di gasto ta afecta e operacion di gasoline stations y nan cashflow directamente, pa cual nos mester tene na cuenta nan descontento.
Si ta papia di absorba e gasto, esaki ta nifica un cos, prijs lo subi. Pa es motibo mi ta kere e “timing” di tuma e decision aki ta uno no faborabel pa pueblo.
Di parti di ministerio di asuntonan economico, nos lo haci tur cos na nos disposicion pa facilita y yuda trece un resolucion na e situacion aki pronto, caminda ambos partido por sali di acuerdo, y ta minimalisa cualkier efecto negativo pa pueblo.
