Recientemente Honorabel Miembro di Parlamento, sr. Robert Candelaria a duna un declaracion den prensa, den cual e la comparti cierto preocupacionnan encuanto e vacaturanan na Arubahuis. Minister Plenipotenciaro, sr. Guillfred Besaril, a tuma nota di e relato den prensa y a duna e siguiente reaccion.
“Den prensa mi a tuma nota di un relato caminda Honorabel Miembro di Parlamentario, sr. Robert Candelaria di partido AVP, den cual e ta insinua cu den porta di eleccion gobierno di Aruba lo tin pensa di yena Arubahuis cu trahado. Mi ta kere ta na su luga pa recorda Sr. Candelaria cu contrario na su partido, Gabinete Wever-Croes si ta tuma gobernacion na serio y semper a tuma pasonan conforme ley na beneficio di pueblo di Aruba en general. Contrario na su gobierno, Gabinete Wever-Croes si a sa di baha gastonan di personal mucho prome cu esaki tabata un exigencia di parti di Hulanda.
E unico punto cu Sr. Candelaria a menciona corectamente den su relato ta e metanan primordial di Arubahuis cu ta pa representa Gobierno, Conseho di Minister y departamentonan gubernamental di Pais Aruba na Hulanda. Su insinuacion cu Gabinete Wever-Croes a yena Arubahuis cu hende ta totalmente incorecto y falso. Y cu gobierno lo kier haci esaki dilanti porta di eleccion ta un ridiculez completo! Realidad a mustra cu esaki tabata e practica di su partido tempo nan tabata den gobierno, pues mi ta compronde for di unda Sr. Candelaria su pensamento ta sali.
Como Minister Plenipotenciario mi ta trahando desde comienso di gobernacion hunto cu Departamento di Recursonan Humano (DRH) riba un plan di restructuracion pa Arubahuis. Por cierto si Sr. Candelaria ta pone mas atencion den e reunionnan di parlamento durante tratamento di presupuesto y den noticia na Aruba, lo e ta bon informa di esaki. Restructuracion di un departamento gubernamental no ta algo cu por wordo realisa sin mas. Tin hopi aspecto cu mester tene na cuenta, entre otro e aspectonan legal, laboral y e factor humano. Arubahuis ta conta cu empleadonan cu pa hopi aña a sirbi Aruba dignamente y ta merece respet y gratitud inmenso pa nan labor desplega. Sr. Candelaria como ex. Alto Inspector den tempo di reorganisacion di Aruba su Cuerpo Policial, mester por tin un bon idea di kico esaki ta trece cune na momento cu no tene cuenta cu e componentenan aki den menciona. E ta un experiencia cu awe mi ta uza pa hunto cu DRH nos guia e proceso den forma exitoso. Pues mi ta invita Honorabel Miembro di Parlamento na apoya e trahadornan di Arubahuis na momento di trata e presupuesto di nos Pais proximamente.
Manera mi a declara anteriormente, COHO a cambia e dinamica di operacion di Arubahuis caminda di awo en adelante mester cumpli cu tareanan cu antes no tabata wordo exigi di nos personal. Hunto cu DRH nos ta evaluando kico lo ta e caminda mas efectivo pa por cumpli cu e tareanan nobo di Arubahuis. Nos ta evaluando e reeducacion of -orientacion profesional di e personal existente y solamente si ta altamente necesario, lo tuma personal nobo den servicio. Arubahuis ta conta cu un personal sumamente capacita cu merece e respet di no solamente Sr. Candelaria, pero di tur cu ta
carga responsabilidad den Staten di Aruba. E hecho cu tin personal ta baha cu pensioen y/of ta probecha di e oportunidad pa bay cu VUT ta algo cu mi no tin den mi man. Mi ta agradecido na e personal cu pa hopi aña a labora na Arubahuis. Den caso di posicionan vacante, si e ta cay den e plan di formacion nobo acorda cu Departamento di Recursonan Humano, lo cana e caminda segun procedura pa e vacatura ser yena.
Mi ta consciente cu campaña a cuminsa pa Sr. Candelaria y cu tiramento di lodo of insinuacionnan muy probablemente lo ta parti di e strategia cu partido AVP lo aplica. Ami no lo participa den e tipo di politica aki y mi ta invita Honorable Miembro di Parlamento, Sr. Candelaria, pa e tambe pone politica bieu un banda, purba un politica limpi y honesto y mi kier recorde riba Santiago 4: 11-12. Guillfred Besaril semper a traha na bienestar di pais Aruba, cumpliendo cu tur reglamento y ley y mi lo sigui traha den forma honesto y transparente na bienestar di Pueblo di Aruba en general”. Minister Besaril a termina.
E potret ta cortesia di Cas di Aruba.
