Reaccion di Hospital riba critica pa cu retiro dr. Jonkhoff

ORANJESTAD – Hospital no ta reconoce ponencianan cu recientemente por a lesa den medionan di comunicacion. Dr. Horacio E. Oduber Hospital tin na prome luga su pashentnan y kier garantisa cu cuido oncologico na Aruba ta uno sigur y di calidad. Loke si nos di hospital ta boga pe ta pa e trankilidad di nos pashentnan y ta desea pa nan ta bon informa tocante e cuido oncologico na Aruba.

Minister di Salubridad actual a purba interveni y intermedia pa loke ta cuido oncologico na momento cu algun luna pasa ponencianan di e dokter concerni a sali den prensa. Pero ta importante pa menciona cu dr. Jonkhoff mes a entrega su retiro y conhuntamente cu hunta di directiva di hospital a yega na e acuerdo pe traha durante e termino restante di su contract. Hospital ningun momento no a para keto despues cu dr. Jonkhoff a entrega su retiro y di biaha a start e proceso di recluta specialistanan capacita pa sigui brinda cuido oncologico. Mester menciona cu apenas 7 aña pasa Aruba a conoce su prome specialista den oncologia y prome cu esey internistanan specialisa tabata encarga cu e cuido di pashentnan oncologico na Aruba. Awe ainda por conta cu 10 internista specialisa banda di nos oncologonan cu t’ey pa brinda cuido na nos pashentnan.

Hospital no solamente ta trahando duro riba recluta specialista pa loke ta e cuido oncologico, pero tambe diferente otro specialismo nan cu ta haci falta riba nos isla pa asina tur nos pashentnan por ricibi e cuido necesario na e momento necesario.

Ta di lamenta cu un persona prominente den comunidad di Aruba ta sali den publicidad y ta haci uzo di sentimentonan di pashentnan oncologico y nan famia sin sa kico Hospital a haci desde cu e specialista a entrega su retiro. Hospital t’ey pa salvaguardia cuido di pashentnan oncologico y tur otro pashent cu mester di cuido.

Pero contrario na loke por a lesa e cuido oncologico ta completamente cubri y tin siguramente continuidad y pues tur pashent por ta trankil. Pronto Hospital lo anuncia e specialistanan den oncologia cu lo bini pa asina reenforsa e team na Poli Oncologie situa na e ya conoci edificio Shocohin.

Hospital ta pidi su disculpa pa informacion incorecto cu por a lesa y ta spera di por trankilisa comunidad di Aruba y sigura tur pashent cu nos t’ey pa brinda e cuido den oncologia di calidad.