Reaccion di CAft riba rapport kwartaal 3-2017 di Aruba

Pa motibo di e interes grandi cu tin, y lo bay tin pa e asuntonan financiero den e lunanan venidero, cu dos presupuesto pendiente, Bon Dia Aruba a dicidi di traduci mayor parti di e texto di e reportahe di e organo di supervision financiero CAft riba e financia publico di Aruba di e di tres kwartaal di e aña aki. A laga afo e ultimo parti, tocante e mehoracion di administracion financiero, pa motibo di espacio.

Evaluacion
E deficit di Pais Aruba ta di 3,3% GDP y e surplus di e demas entidadnan di e sector colectivo ta 0,8% GDP. E deficit financiero di e sector colectivo di Pais Aruba despues di e prome tres kwartaalnan ta alcansa 2,6% GDP. Segun e pronostico den e di tres reportahe, e surplus di e demas entidadnan di e sector colectivo lo vapora completamente pa fin di 2017. Pa reduci e deficit di 3,3% GDP te na e deficit financiero acorda den e Landsverordening Aruba tijdelijk financieel toezicht (LAft) di 0,5%, Pais Aruba den e di cuatro kwartaal mester por mustra un surplus financiero di 2,8% GDP ( 138 miyon florin). E entradanan cu ta anticipa ainda cu ta menciona den e di tres reportahe di ehecucion, entre otro e winstbelasting posponi (e di dos termino di pago pa 30 november), e suma di settlement di Valero y e benta di Fuels Marketing & Supply Aruba (FMSA), sin embargo no ta suficiente pa realisa un surplus financiero asina.

Por lo tanto CAft ta di opinion cu for di e di tres reportahe di ehecucion ta resulta insuficientemente probabel cu e deficit provisional di 2,6% den e ultimo kwartaal lo keda reduci na e deficit financiero maximal di 0,5% GDP na 2017.

CAft p’esey ta pidi bo pa dentro di diescuatro dia, basa riba articulo 16 jo. articulo 11, inciso 3 di LAft pa manda informacion adicional di cual ta resulta cu logra yega na e norma pa deficit ainda ta un suposicion realistico. Den caso cu esey no ta asina, Aruba conforme articulo 17 inciso 3 di LAft mester indica ki medida adicional ta tuma como compensacion pa e deficit menasante aki.

Aclaracion

Deficit financiero di Pais Aruba
Den e di tres reportahe di ehecucion e exploitatierekening di e Pais ta mustra un deficit di 171,4 miyon florin, cu parcialmente ta compensa pa, di un banda un surplus riba kapitaaldienst di 9,1 miyon florin y di otro banda di e demas entidadnan di e sector colectivo un surplus di 36,6 miyon florin. E deficit financiero di e sector colectivo completo ta manera refleha den e tabel aki bao, por lo tanto 125,6 miyon florin (2,6% GDP)¹. E surplus riba kapitaaldienst lo aumenta den e di cuatro kwartaal segun e pronostico den e di tres reportahe di ehecucion, pa motibo di entre otro e beneficionan di e reapertura di e refineria, consistiendo di 40 miyon florin pa e benta di Fuels Marketing & Supply Aruba N.V. y AWG 27,0 miyon di settlement payment di Valero. E surplus di e demas entidadnan di e sector colectivo segun e pronostico sin embargo lo converti den un deficit chikito. Esaki ta significa cu ta necesario un mehoracion grandi di e exploitatierekening pa na 2017 cumpli ci e norma di LAft.

Exploitatierekening
E recursonan realisa den e exploitatierekening ta yega na 863,3 miyon florin y e gastonan realisa na 1.034,6 miyon florin pa cual e deficit riba exploitatiedienst pa e prome tres kwartaalnan ta yega na 171,4 miyon florin. Den e presupuesto aproba pa henter aña ta tuma como punto di salida un deficit di exploitatiedienst di 85,1 miyon florin. Esaki ta implica cu den e di cuatro kwartaal 2017 e saldo positivo di exploitatiedienst mester ta 86,3 miyon florin. Aki bao lo drenta den detaye tocante e entradanan di impuesto y e gastonan riba exploitatiedienst.

Entrada di impuesto
E entradanan di loonbelasting y belasting riba benta di empresa (BBO) no ta mustra e aumento manera esaki tabata pronostica den presupuesto 2017. CAft den su conseho riba e presupuesto aproba pa 2017 y den e consehonan riba e dos reportahenan di ehecucion anterior a indica cu ambos impuesto tabata presupuesta masha halto y lo ta dificil pa logra realisa. Ambos impuesto en berdad a aumenta en comparacion cu 2016, pero no ta mustra e aumento cu ta necesario pa realisa e pronostico pa e presupuesto 2017. Loonbelasting a subi cu 7% den e prome tres kwartaalnan compara cu 2016, pero e presupuesto ta tuma como punto di salida un aumento di 19% na 2017. BBO ta mustra den e di tres kwartaal di 2017 un aumento di 12% compara cu e resultado di aña pasa, pero ta presupuesta na 32% mas halto cu e aña anterior. E beneficionan extra calcula a base di esfuerso pa mehora cumplimento te awor no a materialisa suficientemente.

Ta parce improbabel cu lo realisa esaki completamente den e ultimo kwartaal. CAft a elabora un pronostico pa ambos categoria , a base di e patrononan di temporada na 2016 y e realisacion den tres kwartaal di 2017. A base di e pronostico aki loonbelasting lo tin un resultado negativo di alrededor di 30 miyon florin y BBO di alrededor di 19 miyon florini. Esaki ainda ta en general e mesun magnitud cu CAft a pronostica den su conseho riba e prome reportahe di ehecucion 2017.

Mientras tanto, a base di e di tres reportahe di ehecucion tambe ta bisto cu e impuestonan di importacion ta aumenta menos fuerte di loke tabata presupuesta. E impuestonan di importacion den e tres kwartaalnan di 2017 a mehora cu 3% en comparacion cu e realisacion na 2016. E presupuesto sin embargo tin como punto di salida un aumento di 11% compara cu e realisacion di henter 2016. Pa e impuesto di importacion CAft ta pronostica un resultado negativo di 13 miyon florin, riba e otro resultadonan menos positivo menciona. Contrario na e resultadonan negativo menciona tin tambe algun resultado mas positivo cu loke a pronostica, manera den interes riba cobransa di belasting, overdrachtsbelasting, impuesto riba vehiculo y accijns riba sigaria. Segun e patrono di temporada di 2016 conhuntamente esakinan por conduci na un extra entrada di 12 miyon florin. Por lo tanto CAft ta pronostica un deficit di alrededor di 50 miyon florin, cu e entradanan di belasting menciona.

Banda di esaki tin incertidumbre pa loke ta e factibilidad di e winstbelasting presupuesta pa 2017. Por medio di un cambio di ley riba tereno di winstbelasting, e asina yama Voldoening op Aangifte Systeem (VAS), e ritmo di pago di winstbelasting a cambia. Desde 2016 mester haci tanto e declaracion (aangifte) como e pago pa mas tarda dia 31 di mei. Banda di esaki tin un posibilidad di posponemento pa e declaracion y pago te pa mas tarda 30 di november. Pa motibo di un areglo di transicion introduci pa Servicio di Impuesto despues di e introduccion di e VAS, tabatin sin embargo na inicio di 2016 un extra posibilidad di pospone pago di winstbelasting 2014. Pa e motibo aki e patron di temporada di winstbelasting na 2016 no ta duna un bon imagen di e patrono na 2017. Sin embargo, mientras tanto a drenta na winstbelasting despues di tres kwartaal 131,4 miyon florin, riba un presupuesto di 225 florin miyon. Esaki ta significa cu cu mester drenta ainda 93,6 miyon florin den ultimo kwartaal, mientras cu na 2016 a drenta solamente 52,8 miyon florin den e di cuatro kwartaal. Posiblemente lo tin tambe den winstbelasting un resultado negativo.

Gasto
E gastonan realisa riba exploitatierekening ta yega na 1.034,6 miyon florin. E gastonan di personal realisa (gasto di personal y contribucion di dunador di trabao) ta 9,2 miyon florin mas halto cu e realisacion den e mesun periodo na 2016. Den e reportahe di ehecucion aki ta indica cu a tuma, como saldo, 187 fte (functie-taak-eenheden’) den e prome tres kwartaalnan di 2017. Den e reportahe di ehecucion ta indica ademas cu esaki ta cuadra cu e maneho di empleo dentro di e vacaturestop. CAft lo desea di tende di cual manera e maneho di empleo aki ta cuadra cu un vacaturestop. Tumando na cuenta tur cos, tambe pa via di e tumamento na servicio aki, ta di anticipa un resultado negativo encuanto gastonan di personal. CAft ta conseha pa reduci e gastonan di personal mas pronto posibel.

Riba e categoria bienes & servicio, cu 122,0 miyon florin, a gasta mas cu den e prome tres kwartaalnan di e aña anterior (101,7 miyon florin). A base di e patrono di temporada di e añanan anterior e categoria di gasto lo por bay mustra un exceso grandi pa fin di 2017. Aruba ta indica cu pa motibo di a aproba e presupuesto na tempo, un parti mas grandi di e gastonan a ser haci na inicio di aña. Ademas cierto compromisonan cu mester cumpli, a drenta den e prome luna di e stop riba compromiso, luna di september, pero pa e ultimo kwartaal ta calcula cu esakinan lo ta bin mas abao. Aña pasa e stop di adkiri compromiso a cuminsa te na october, pa cual no ta posibel compara e patrononan. A base di e informacion aki por lo pronto no ta parce cu tin motibo pa anticipa un exceso di gasto compara cu presupuesto pa e categoria aki. E otro categorianan di gasto tambe ta parce di ta cana den linea cu e presupuesto y lo no percura pa resultado positivo o negativo significante.

Kapitaaldienst
Riba kapitaaldienst a drenta 37 miyon florin den e prome tres kwartaalnan di aña. Di esaki AWG 24,3 miyon ta procedente di afschrijving y 3,2 miyon florin di pago di credito local, principalmente pago na gobierno di prestamo di estudio.

E resto di 9,7 miyon florin ta di benta di propiedad, y no ta contempla den presupuesto, anto ta trata di un resultado positivo extra. Na otro banda di e entradanan, tin actualmente registra 27,9 miyon florin na gasto di capital, di cual e gran parti 20,4 miyon florin ta trata di prestamo di estudio otorga. Pa prestamo di estudio tin 35 miyon florin presupuesta riba kapitaaldienst, pero ta anticipa cu lo no mester asina hopi gasto. Tur cos hunto, kapitaaldienst ta cera despues di 3 kwartaal cu un saldo positivo di 9,1 miyon florin. Riba henter 2017 ta presupuesta cu e kapitaaldienst lo tin un surplus di 60,5 miyon florin, principalmente pa e suma di settlement di Valero di 27 miyon florin y e benta di FMSA di 40 miyon florin, cu mester keda procesa ainda den di cuatro kwartaal. E entradanan incidental positivo menciona lo bin suma ainda riba esakinan.

Saldo financiero di sector colectivo
E demas entidadnan di e sector colectivo ta yega despues di tres kwartaal na un saldo financiero di 36,6 miyon florin. Segun e pronostico den e reportahe di ehecucion e surplus financiero aki lo converti den e ultimo kwartaal den un deficit (chikito). Den caso di SVb esaki ta principalmente causa pa e hecho di e aumento den fase di edad di pension, cu e entradanan nobo di pensionado ta drenta desde 1 di juli di cada aña den e fondo di AOV. Pa motibo di esaki principalmente den e ultimo kwartaal ta drenta hopi menos entrada di prima, compara cu e gastonan di e pagonan di pension cu mester sali.

E saldo di AZV lo converti di 7,2 miyon florin positivo den un deficit di 6,7 miyon florin. Esaki pa un parti importante ta debi na e alrededor di AWG 10 miyon di gastonan extra pa diferente expansion na hospital (HOH) cu lo keda administra den ultimo kwartaal. E suma aki a keda reduci cu AWG 5 miyon pa motibo di algun retraso cu a tuma luga.

Tambe e surplus di Aruba Tourism Authority (ATA) segun e pronostico lo baha di 13,3 miyon pa AWG 6,0 miyon florin. Tur e demas entidadnan di e sector colectivo hunto lo yega, den e pronostico mas reciente, na un deficit pa 2017 di 2 miyon florin. Finalmente, na Serlimar, te cu september, tin un deficit di 3,5 miyon florin, pero den e reportahe di ehecucion no tabatin ainda un pronostico di fin di aña disponibel. Cu esaki, e entidadnan aki segun cu ta anticipa, lo no haci un sosten positivo na e saldo financiero di Aruba.

Necesidad di financiamento y posicion encuanto likides
Pa Aruba tin na 2017 un necesidad di financiamento di 439 miyon florin stipula. Den e programa di prestamo 2017 a anuncia cu e bononan estatal durante 2017 lo ser adkiri den cuatro parti riba mercado local contra un interes di maximal di 4,75%. Riba 25 di augustus ultimo a adkiri e ultimo parti di 125 miyon florin pa un interes di 4,5%. E interes promedio pa cupo di henter e programa di prestamo 2017 ta 4,21%.

Despues di tres kwartaal e debe estatal ta AWG 4.184 miyon (86% GDP). E debe publico di Aruba, si no tin algun deficit complementario di financiamento, lo baha den e di cuatro kwartaal pa motibo di tin 96 miyon florin na cancelacion di debe di Aruba pa haci.

Nota di redaccion:

Banda cu e documento ta papia pa su mes, por mustra tambe riba e situacion na fin di prome mita di aña, unda segun CAft cos tabata mas o menos na orden, mientras tabatin un deficit preocupante caba di 95 miyon florin riba exploitatierekening. Cu awor den tres luna a bira 171 miyon, na luga di mustra un mehoracion. Manera CAft mes ta indica, den e ultimo parti di aña dificilmente e imagen negativo aki ta bay mehora.

Tambe CAft ta tuma como punto di salida cu e benta di e refineria ta trece 40 miyon florin den caha di gobierno, sino den un solo biaha e posicion financiero ta empeora cu e suma aki, cu ta representa 0,8% di GDP. Hunto cu e 2,6% di deficit actual, mester tene cuenta cu un deficit na final di aña di mas di 3%.