Prome Minister Evelyn Wever-Croes a bisa cu e mes no sa e nomber di e compania cu a cumpli cabalmente cu e rekisitonan exigi durante e dos proceso di Request For Expresion Of Interst (REOI) I y II, cu a tuma luga pareu pa busca alternativa pa e refineria su futuro. Igualmente el a laga sa cu e ta prefera di abstene di divulga nomber, te ora cu e proceso di seleccion ta yega su final.
“Mi mes no tin e nombernan. Sino mi por suministra nan…” El a duna un update ayera mainta a base di loke e mandatario a haya for di Refineria di Aruba (RdA). El a sigura cu e nombernan nos lo haya nan den e relato final, y unabes cu e tine, e lo divulga na prensa.
Lease tankinan
Sinembargo e parti di e terminal y e tankinan ta separa for di e proceso di REOI I y II. E ta cay bao un acuerdo di lease cu RdA ta cerando cu un compania pa huur 7 tanki cu ta den bon estado actualmente y cu nan ta bashi.
Segun e mandatario, e acuerdo entre RdA y e compania cu lo lease e tankinan ta basta avansa caba, y seguramente pa e luna aki actividad ta cuminsa. Un biaha mas, Minister Presidente a sigura cu e no tin e nomber di e compania, pero el a keda di averigua cerca RdA pa asina hacie publico. E compania estatal aki lo bini cu mas informacion pa prensa riba e topico aki.
Pero si el a sigura cu e acuerdo ta casi kedando cla, loke ta nifica entrada necesario pa RdA. Mientras cu tin otro tres tanki pendiente RdA por clean up y haci nan bashi pa por lease nan. El a sigura cu esaki ta totalmente otro procedura cu esun di e refineria, ya cu esaki ta trata di huurmento di tankinan.
