Pa motibo di medida di prevencion y en espera te ora cu tin un aclareacion di e situacion, Rijksdienst Caribisch Nederland (RCN) a pone un prohibicion temporal pa rijksambtenaren cu ta biaha cu e compania nacional di Curacao Insel Air. Esaki a keda confirma awe mainta pa vocero di RCN sra. Lucia Beck. Na mes momento, pa medio di e secretario di estado Sharon Dijksma y minister di asuntonan interior y relacionnan di Reino sr. Ronald Plasterk, e gobierno Hulandes a expresa su precupacionnan y importancia pa informa otro pasaheronan di e situacion via un carta dirigi na tweede kamer.
E prohibicion ta conta pa Insel Air International BV y esaki ta bin net despues cu manera ya caba Bon Dia a trece pa dilanti cu consulado Americano tambe a prohibi su personal pa biaha cu e compania aki di aviacion. No ta conoci ainda si e prohibicion aki lo mester wordo extendi pa Insel Air Aruba tambe y lo mester warda riba un investigacion mas extenso.
Incidente
Tabata durante un vuelo di Curacao pa Miami cu e pasaheronan a pasa susto di nan bida ora cu e presion di aire den cabina lo a baha abruptamente y nan lo mester a huza mascara di oxigeno. Un video di e susedido a keda emiti riba rednan social pa un persona abordo cu a filma tur cos. E mesun siman cu esaki a pasa, pilotonan di Insel a nenga di lanta avion na Sint Maarten ya cu esaki tabata den un condicion deplorabel.
Situacion actual
E compania tin 750 trahador y ta conta cu un flota di 18 avion cu ta bula 26 diferente destinacion. Ochenta porciento di e flota di Insel Air ta wordo wanta na tera na e momento aki pa inspeccion. Ta trata di avionnan tipo MD80 y Fokker 50/70. E situacion ta pone cu Insel lo ta encontrando su mes cu un reto grandi ya cu no por cumpli cu su vuelonan, treciendo hopi pasahero den un stress manera cu a pasa entre otro na airport di Curacao. Financieramente e compania no ta den su mihor momento.
Recientemente gobierno di Curacao a duna un fiansa di 35 miyon florin a cambio di control den e compania. Durante un entrevista, minister Eugene Rhuggenaath encarga cu cartera di economia no por a bisa si lo mantene e fiansa na 35 miyon florin of si esaki lo por of mester bira mas. “Nos no por permiti cu e compania nacional aki kibra ya cu e lo trece problemanan den nos economia”, e minister ta bisa. Den mes un rosea e la splica cu no ta e intencion cu gobierno ta bay bira un compania di aviacion.
Inspectie Leefomgeving en Transport (ILT) di Hulanda lo ta yudando den un termino corto cu inspeccion di e avionnan segun e gabinete na mando.
Foto cortesia: Wikimedia commons
