RBC Aruba ta bay notifica tur su tenedornan di cuenta bancario di Venezuela, cu no ta residencia na Aruba, cu nan ta pasa pa elimina e cuenta bancarionan aki.
Supuestamente esey lo tuma lugar via un carta den cual esaki ta ser anuncia. Comunicacion cu gerencia di RBC mes no a resulta den un confirmacion oficial, sin embargo muy probablemente, segun un fuente interno, cu a prefera di mantene su nomber for di publicidad, e siman aki lo bin un declaracion oficial di e banco, confirmando e noticia.
Segun un conocedor di e materia aki cu redaccion a consulta, e medida aki por tin di haci cu e reciente medidanan cu gobierno Mericano a tuma en cuanto e trafico financiero cu Venezuela. Por ta cu Merca a emiti reglanan mas severo pa cuenta di ciudadano Venezolano en general, pero esey no ta conoci ainda. Tambe por ta cu banconan intermediario na Merca ta urgi pa mas cautela cu tramitacion financiero pa tenedornan di cuenta di Venezuela cu no ta residencia na Aruba, cu ta dunando mas problema den establece origen confiable di sumanan cu ta drenta riba cuentanan teni localmente. Ta mustra tambe riba e probabilidad cu e banco mes lo no cera e cuentanan inmediatamente, pero lo duna e clientenan un tempo di gracia pa nan elimina nan cuenta, indicando tambe unda eventual saldo di e cuenta lo mester bay. Esaki lo ta di acuerdo cu bon practica comercial.
Redaccion di Bon Dia Aruba lo drenta den contacto tambe cu otro banconan local, si acaso nan tambe mester bay maneha un politica similar o parecido pa cu nan clientenan Venezolano, no residencia localmente.
