Awe empleadonan di RBC Royal Bank na Sasaki a drenta nan di tres dia di welga. Segun Rudy Geerman di sindicato FTA, lamentablemente pa ‘terkedad di gerencia di banco’ nan ta sigui riba nan welga contra e banco. RBC awor ta den proceso pa lanta un caso contra empleadonan pa nan stop di welga y bay traha bek.
Miembronan di FTA na RBC Royal Bank a dicidi di bay den welga desde diamars mainta contra gerencia di RBC. Nan a bin cu un par di stoel pafo bao di un palo di kwihi banda di e banco unda nan ta para hunto cu otro cu T-shirtnan skirbi ‘ami ta aprecia’ na Ingles. Algun cu borchinan den man cu ta bisa ‘no mishi cu nos CAO’ y ‘respet pa nos principio’.
Gerencia a yama nan diamars merdia pa sinta na mesa. Lamentablemente segun FTA, nan no por a yega na ningun solucion. Tin algun trahado cu a keda traha den banco, pero e capacidad di personal ta minimo, como e mayoria ta para pafo. Den un encuentro ayera mainta cu mediador hunto cu gerencia, mediador a haci intento pa pone e partidonan na mesa pa wak con pa yega na un solucion.
“Pero nos ta sinti cu gerencia ta kere nan tin rason di locual nan a haci. Nan no ta move for di nan posicion. Esey a conduci cu no a saca nada”, sr. Geerman ta bisa.
E welga ta palabra pa continua awe mainta pa di tres dia.
Welga contra gerencia
E empleadonan aki no ta accepta e forma cu nan ta wordo trata ni seguramente e decision di e compania pa kita e beneficio di plan di spaar hancra den e CAO cu a keda firma april ultimo. “Apenas a caba di firm’e,” sr. Geerman ta expresa na Bon Dia. E ta sigui bisa: “Naturalmente durante negociacion semper gerencia ta kere cu e tin un articulo specialmente e parti di spaar. Cu locual e ta paga na interes no ta conforme e mercado y ta kere cu e no por sigui pag’e.” E lider sindicalista ta declara ayera durante e di dos dia di welga cu nan no a logra keda convenci pa kit’e for di e CAO cu a keda firma.”Semper nan a bisa nos nan kier cana e caminda legal pa wak si berdad nan mester sigui pag’e. Nos a bisa banco nan tin derecho di haci esaki cualkier ora pa puntra hues si locual bo ta paga ta hustifica si of no.”
Stop spaar plan
Nan a firma na april y locual a tuma luga awor ta cu nan a haya un carta bisando empleadonan entrante 1 october lo stop e spaar plan ey, y cu nan lo bay corte pa busca nan derecho. “Eynan nos a tuma nan hopi na malo pasobra bo tin un acuerdo firma entre dos partido. Cual ta nifica cu dos partido mester bay di acuerdo pa firm’e paso abo so no por haci e. Bo tin tur derecho pa bay corte pero no haci locual bo ta haci pasobra ta palabracionnan tabata tin cu boso no por kibra.” Esaki pues a escala awo na momento cu gerencia a dicidi di stop cu e spaar plan segun FTA. “Tur momento nan tabata bisa cu nan lo haci e pero awor cu per 1 october a stop e plan, esaki ta e consecuencia pa e welga aki cu ta bay sigui.”
Caso contra empleadonan
Locual FTA a compronde for di banco ta cu nan lo pensa di cuminsa un caso contra nan pa laga hues pone empleadonan bek na trabao. Nos a puntra sr. Geerman kico lo ta e consecuencianan di esaki awo pa nan. “Nos ta pidi for di akinan e comprension di e pueblo. Pasobra esey hopi biaha den casonan asina e cliente ta esun cu ta sufri. Locual cu banco ta haci no ta corecto y hopi di e clientenan ta compronde. Pasobra bo por bisa cu diamars merdia clientenan a trece cuminda pa e trahadonan aki fo.” FTA ta bisa cu e clientenan ta mira cu e trahadonan ta buscando nan derecho y simplemente banco tin e ‘terkedad’ pa no compronde. Sr. Geerman: “Nos sa cu tur e decisionnan ta wordo tuma na Canada. E gerentenan local mester djis bisa si na locual ta bin for di Canada.”
RBC Royal Bank no ta reacciona
Bon Dia a purba haya un reaccion for di RBC Royal Bank riba e puntonan menciona. Nan ta opta pa no duna ningun declaracion na momentonan aki. Segun nos a compronde for di gerencia y manera nan a declara na mas prensa, ta opta pa no comenta awor pasobra e ta un situacion interno. Nan a bisa Bon Dia cu ora nan ta cla pa duna un declaracion, nan lo sigura di comparti esaki cu tur prensa por medio di un comunicado.
