Hulanda no kier recolonisacion sino fortificacion pa un autonomia real
Un pais sin perspectiva no tin autonomia. Y Hulanda netamente kier yuda e paisnan CAS, Corsou, Aruba y St. Maarten bira realmente autonomo di forma cu nan ta brinda nan ciudadanonan e perspectiva pa un miho bida. Pero alabes, mester tene cuenta cu e forma con ta bay traha na dje ta cu placa di e pagado di belasting Hulandes, pa cual mester duna cuenta na Hulanda.
Asina Secretario di Estado, Raymond Knops a splica durante un entrevista extenso cu TeleCuraçao ayera. Knops ta enfatisa cu henter e pakete di medida ta dirigi pa duna perspectiva na ciudananonan di Cosou, Aruba y St. Maarten.
“Ta ora pa haci cosnan bon pa duna perspectiva,” e Secretario di Estado Hulandes encarga cu Asuntonan di Reino a enfatisa. A cuminsa esaki pa medio di asistencia cu medio na un balor di 40 miyon euro pa tur tres pais, cu mester percura entre otro pa cuminda pa famianan cu a keda sin trabou. E ayudo aki ta en principio te cu fin di aña. Na Corsou so e paketenan di cuminda ta sostene 12 mil famia, pa un total di como 50 mil hende, mientras cu na Aruba e cantidad no ta keda mucho atras.
Landenpakket ta palabra prome cu Covid
No ta di awor cu Hulanda ta den combersacion pa cambionan fundamental den e forma di hiba maneho financiero/economico riba e islanan. Sinembargo, e crisis di Covid a trece un urgencia, segun Raymond Knops. Particularmente mirando cu e islanan ta depende di biyones di sosten for di Hulanda.
Ta for di mei caba a cuminsa papia cu e Gobiernonan di e paisnan, riba e entidad cu mester maneha e fondonan aki. “Esaki ta un mundo nobo,” Knops a bisa.
Na Corsou el a reuni no solamente cu Prome Minister Ruggenaath y otro lidernan di Gobierno, pero Knops a bisa cu el a haci esfuerso pa bishita hende comun na nan propio cas tambe, pa haya un miho bista di e realidad na Corsou, ademas di combersacionnan cu sector empresarial.
Deliberacion
El a menciona cu el a bay Corsou pa delibera cu Gobernantenan, y a bisa di tin contacto cu Gobierno di Aruba tambe. Pero e pregunta ta con e por ta delibera, si su mesun contestanan na miembronan di Tweede Kamer ta indica cu no ta bay haci concesion. Esaki riba e rijkswetnan y e condicionnan pa e entidad di Recuperacion y Reforma, encarga pa maneha e fondonan di sosten. Knops a bisa cu “nos ta keda cu liñanan habri, pero nos a bisa si cu mester bay de acuerdo cu e pakete pa por ricibi e ayudo. Gobiernonan mester acepta, pero finalmente e Parlamentonan mester vota si.”
Knops a sigui bisa cu a keda combersa cu e tres Prome Ministernan, riba e disponibilidad pa yuda e islanan cu biyones, pero “nan ta mara na e condicionnan pa motibo cu ya caba, prome cu Covid19, e situacion financiero/economico tabata dificil. E crisis di Covid a unicamente empeora e situacion.”
E obligacion ta pa yuda e ciudadano
Segun e Secretario di Estado, politiconan tin e obligacion pa haci lo corecto pa e ciudadanonan, cu mester tin perspectiva, cu nan tin futuro. “Tin mucho hende cu entradanan demasiado halto, otronan cu no ta paga belasting, e cuido ya no ta pagabel. Y tur ta esencial pa un pais. Di forma cu ta duna hobennan studia e confianza cu nan por bolbe nan pais pasobra nan tin perspectiva. Esey ta nifica cu mester reforma. Nos a palabra esey caba cu e paisnan mes.” Finalmente a propone e idea di e organo, y a bisa e Gobiernonan cua ta e liñanan grandi, cu ta inclui miho educacion. Hulanda ta conta cu e acuerdo, pero e paisnan tambe por pone kico ta nan prioridadnan den e acuerdo pa asina yega na e consenso. “Mi ta kere cu ta un bon oportunidad pa e paisnan haci uzo di e posibilidad aki pa nan reforma.”
Knops a bisa cu netamente e funcion di e consensusrijkswet ta percura pa un fundamento huridico. Locual ta bay haci ta ehecuta en realidad, e palabracionnan haci caba den e diferente protocolnan, y lo tuma siete aña. Esey ta pidi hopi di un Gobierno, pero a lo largo e ta nifica mas entrada cu por dedica miho na educacion, por ehempel. “Como parti di Reino, mi ta sinti cu nos tur ta obliga pa duna perspectiva.” Un pais mester por carga su autonomia, ta su opinion.
No ta e idea pa recolonisa
No ta e intencion di Hulanda pa tuma encargo di paisnan CAS. “Esey no ta nos ambicion. Nos ta para na banda di e ciudadano.” Knops a bisa cu Gobierno Hulandes ta den combersacion continuo cu Gobierno di Corsou, St. Maarten y Aruba for di comienzo di e crisis di Covid. Berdad ta si cu e contenido di e textonan huridico a bin un siman prome cu e reunion di Conseho di Minister di Reino, den e caso aki cu a tuma luga dia 10 di Juli. Pero e ta un custumber cu e documentonan pa e reunion aki ta bay pa e paisnan un siman prome. “Pues e imagen cu esaki ta mishi cu autonomia no ta corecto. E medidanan ta basa riba palabracionnan cu a haci caba. Locual nos mester ta un aprobacion pa e organo cu pa siete aña ta bay traha cu fondonan di pagado di belasting di Hulanda y nos mester duna cuenta na Parlamento Hulandes pa esaki. Y nos kier haci’e na un bon forma.”
E combersacionnan cu e ta tene cu ciudadanonan comun ta mustra cu nan no tin problema cu entidad. E ta sinti cu e discusion di autonomia ta mas concentra den e Parlamentonan. “Ami lo bisa, confia mi. Wak mi den mi wowo, y tin e conviccion cu por confia mi. E agenda di Gobierno di Hulanda ta pa yuda hende, pa percura cu tin mas solidario. Politiconan, sea na Hulanda, na Corsou tin e responsabilidad pa yuda esnan cu mas mester di dje.” Den otro palabra, si e pregunta ta cu e paisnan ta keda cu nan autonomia, e contesta ta “si. Pero cu Hulanda ta keda cu supervision riba e forma con ta uza e placa y cu e ta bay pa locual ta necesario? Anto e contesta eynan tambe ta si.
Knops ta reitera su pensamento cu si Corsou, St. Maarten y Aruba kier ta realmente autonomo, nan mester percura cu no tin pobresa riba e islanan y e sosten Hulandes pa medio di entidad lo logra esey.
Pakico awor
Mescos cu na Aruba, na Corsou tambe ta sinti cu Hulanda ta probecha di un momento di crisis pa pusha medidanan fuerte. Knops a bisa cu si tin economia cu ta permiti empresanan draai y tambe ta pone hendenan na trabou, ta e momento tambe pa tuma pasonan structural. Pasobra, Hulanda ta sigui yuda cu medicina, cu pakete di cuminda. Y sosten por bin den forma di regalo, particularmente pa enseñansa. “Esey nos lo haci tambe. Pero alabes ta bay fia. Pues ta net awor, tin e oportunidad pa haci locual hopi hende (na Corsou) ta sinti cu mester a haci caba. Pasobra nos tur tin e tendencia pa pusha problema pa despues.”
Sinembargo esey no ta oportuno awor cu kier drecha asunto, segun Raymond Knops. “Wak e problemanan cu tin den bo mesun pais y wak e votado den wowo, y scohe pa bo pais.”
E Secretario di Estado ta bisa cu e ta convenci cu mayoria ciudadano di e paisnan CAS, ta prefera di produci nan mesun placa sin ta depende di un Cruz Cora of otro instancia pa cuminda. Como sociedad e ta nifica pues, pa reforma. Y cualkier cu bisa cu esey no ta necesario no ta papia e berdad.
Elimina pobresa
Motibonan di e problemanan structural ta pasobra pa hopi aña no a percura pa un nivel di finanzas publico sostenibel, unda a uza e fondonan debidamente, sigur den enseñansa. Pa Corsou, e situacion di Venezuela a afecta e pais mas grandi ainda. Y Covid a pone henter mundo para keto. “Ningun hende por yuda, pero mester haci Corsou y e otro paisnan mas resistente di e shocknan externo.”
Relacion
E relacionnan den Reino ta bon, pero por ta miho, Raymond Knops a declara. “Pero nos no por nenga cu tin un problema awor. Si keda tuma tempo pa no acepta e condicionnan, e situacion lo bira pio.” TIn biaha mester tuma un decision mesora pa yega mas lihe unda kier ta, Knops a ilustra. Particularmente pasobra e contenido di e landenpakket ta algo cu a palabra caba cu tur e paisnan.
Mas lihe e Gobiernonan acepta, mas lihe por cuminza implementa e reformanan. Y aunke e proceso huridico pa e consensus rijkswet lo tarda, por cuminza traha basa riba un solucion intermediario te ora cu yega na e leynan. En todo caso Knops a bisa si cu Parlamento Hulandes nunca lo manda placa sin cu e ta mara na e consensusrijkswet. “Si haci’e hunto, e lo traha na beneficio di tur.”
Knops a bay Corsou y Boneiro pa discuti e temanan aki. E no por a bin Aruba pa motibo di e Codigo Oranje cu tin efecto p’e, ora cu e bolbe Hulanda.
