Parlamentario Kamperveen a yega di trece diferente sugerencia con Gobierno lo por genera mas entrada pa pais Aruba, por medio di mas cumplimento di nos comunidad en general.

1. Gobierno di Aruba mester introduci un sistema di number unico (unieke nummer), manera p.e. BSN- nummer di Hulanda of Persoonsnummer di Aruba. Cu lo mester wordo centralisa via di CENSO of Departamento di Impuesto (DIMP);

2. Mester enfoka riba technologia moderno (data), unda cu departamentonan di Gobierno mester intercambia informacion concreto y corecto; 3. Aruba mester por traha manera un gemeente, unda cu tur instancianan di Gobierno di Aruba, publico/ semi publico/ companianan estatal, lo mester ta conecta cu otro por medio di un sistema general (data base).

Si Aruba usa tecnologia manera sugeri, ingreso di impuesto y otro tipo di entradanan lo por subi substancialmente; 4. Basa riba e database por cuadra of compara (matching) data entre e departamento nan gubernamental, manera CENSO, DIMP, Social Verzekeringsbank Aruba (SvB), DIMAS, AZV, Departamento di Labor (DPL), Departamento Social, Departamento di Infrastructura y Planifacion (DIP), Kadaster etc.;

5. Gobierno di Aruba conhuntamente cu DIP y DIMP mester yega na un acuerdo cu su companianan di utilidad, manera WEB NV y NV ELMAR, pa haci comparacion di cas y negoshinan ariba Pais Aruba pa un mihor cobransa di Erfpacht, Grondbelasting, Toeristenheffing y Belasting Bijzondere Verblijf etc.;

6. Desde aña 2013 en adelante, Aruba a conoce un crecemento drastico di Turistanan cu ta haci uzo di “other accommodations” manera p.e. Airbnb, Booking.com etc. Aki tin oportunidad pa verifica a base di informacion online, pa cuadra y compara cu informacion di DIMP mas mihor.

Mester ta cauteloso ora ta papia di introduci un VAT/ BTW of expande cu otro impuesto asina lihe, sin cu nos a purba e puntonan ariba menciona. Alabes gremionan comercial ta di opinion cu Gobierno di Aruba por cobra BBO di 6% na frontera di Aruba (bij de grens), pa asina crea un sistema unda mas hende y comerciantenan no conoci pa DIMP of Aduana por cuminsa cumpli cu nan “fare share”. Asina aki ta evita di hisa e costo di bida y e costo di haci negoshi aki na Aruba mas ainda. Esaki ta algo cu Gobierno di Aruba mester considera.