Raymond Kamperveen ta un parlamentario nobo di partido Raiz cu a conta pa Bon Dia Aruba su expectativanan awor cu el a drenta den area legislativo aki, expresando cu awor nan ta bay purba di haci cambio of purba di trece un diferencia den haci politica den parlamento.

Kamperveen a splica cu esaki ta comienso nobo pa su persona pa ta den parlamento “esaki ta un reto nobo den mi bida, unda cu nan a duna mi e confiansa pa bay traha pa e pais Aruba, den caso aki pa pueblo”, el a sigura.

Di mesun manera, di su parti profesional el a duna di conoce cu e ta un persona cu a studia na Aruba y bay sigui su estudionan na Hulanda na aña 1997 hasta 2003, el a specialisa den area di economia fiscal na unda cu na 2005 el a bin back Aruba y for di e aña ey te cu september di e aña aki 2021 el a traha na Departamento di Impuesto como auditor, ademas e tambe ta un persona cu ta boluntario den diferente organisacion pa yuda comunidad.

Kamperveen cu ta un forma parti di partido Raiz manera a menciona caba, el a bisa cu esaki ta un partido relativamente nobo cu ta purba di bay haci cambio of purba di trece un diferencia den haci politica den parlamento y nan tin cu wak bon con pa haci’e “pasobra nos dos cu ta parlamentario nobo, tanto pa Mysha como pa mi, e ta bay ta algo no facil pasobra tin hopi parlamentario cu tin mas experiencia cu nos den trabao pero nos ta personanan cu por siña lihe y adapta lihe na e situacion aki como profesionalnan”, el a expresa.

For di algun tempo caba, partido Raiz ta bin vociferando y haci cosnan diferente, segun Kamperveen a señala y nan ta kere cu nan lo demostra esey durante e añanan cu nan lo bay ta den parlamento.

“Tur parlamentario akiden ta trahando pa Aruba y ta supone cu ora bo ta traha akinan, bo tin cu pone bo color y bo partido un banda pa defende y zorg pa e bienestar di pueblo den general y loke ta bon pa Aruba pasobra nos ta esun cu ta controla gobierno y tene nan integro y honesto pa loke nan trabaonan ta y si tin cosnan cu no ta corecto, nos tin cu cuestiona y trece esunnan responsabel bin duna cuenta na parlamento”, Kamperveen a declara.

Tambe el a señala cu nan ta habri pa e pueblo cu tin puntonan cu mester trece dilanti of cosnan cu nan kier wak haci door di parlamento of gobierno.

Pa finalisa, for di su perspectiva Kamperveen ta pensa cu e parti di salud mental ta hopi importante na e momentonan aki. “Nos tin cu traha for di e chikitinnan y hobennan te cu nos adultonan mayor, pasobra e pandemia a pone nos para keto un rato pero hopi di nos grandinan por ehemplo a para keto di berdad pasobra nan tabata nan so den nan cas cu soledad y cu pensamentonan unda con nan ta bay sigui bay dilanti y cu cosnan tambe ta birando caro. Tin hopi cos cu ta andando aparte di salud mental y problema economico di nos hendenan cu a bay atras, y mester wak con ta bay alivia esey y yuda. Tambe e productonan cu ta bin cu dia pa dia ta birando mas caro aworaki, cu por ehempel e containernan su prijsnan a subi y asina nos ta bay wak con nos ta bay regla den un tempo di crisis dificil asina. Zowiezo tambe mester sigui prepara e veld di salud pa yuda nan duna e hermentnan corecto pa nos por prepara miho y nos por atende cu nos hendenan, pashentnan cu mester di dje mas cu nunca”, el a sigura.