Ayera e buro di rating internacional Standard & Poor’s a cambia su bista riba e situacion financiero-economico di Aruba di uno negativo pa uno stabiel, maske e rating en si ta keda mescos. Un di e motivacionnan primordial cu e buro a cita pa yega na e rating ta e echo cu Aruba tin bon relacion cu Hulanda.
Den un comunicado minister Xiomara Ruiz-Maduro (MEP) ta informa cu for di e rating bureau internacional Standard & Poor’s (S&P), gobierno di Aruba a ricibi e grato noticia cu Aruba a mehora su rating. S&P den su evaluacion financiero y economico di Aruba ta afirma e rating BBB+ y ta cambia su mira pa futuro di negativo pa uno stabiel uzando e terminologia ‘Growing Prosperity.’ E rating aki ta brinda confiansa den Aruba na inversionista internacional.
Mira pa futuro stabiel, cu caminda di cana pa reduci gasto publico
Segun e mandatario S&P ta reconoce cu gabinete Wever-Croes a trece cambionan necesario pa recupera e situacion financiero y economico di Aruba, pero ta menciona cu gobierno tin un trayectorio pa cana ainda pa reforma e sistema fiscal y pa reduci e gastonan publico. E puntonan fuerte pa e grado di credibilidad ta cu Aruba tin relacion fuerte constitucional cu Hulanda, e stabilidad politico y un crecemento economico modera. Aruba su economia en comparacion cu e otro paisnan den region ta miho, maske cu actualmente nos economia ta depende principalmente di turismo.
E cambio den rating di S&P ta un logro positivo pa nos gobierno y pa pais Aruba. Esaki ta resultado di trabou serio y dedica pa por recupera y mantene e credibilidad financiero internacional pa nos pais. Gobierno di Aruba y minister Ruiz-Maduro en particular ta gradici tur e instancianan cu a reuni cu S&P. Hunto nos ta logra pa recupera e credibilidad financiero di Pais Aruba.
