Un rapporteur di racismo pa Nacionnan Uni a critica e prohibicion di burqa recientemente implementa na Hulanda como ‘haci mas malo cu bon’.
Tendayi Achiume, un reportero pa Conseho di Derecho Humano di ONU a bisa ayera cu e cantidad chikito di muhenan kende ta bisti e velo Islamico cu ta cubri henter e cara, a reporta di a sufri mas acoso desde cu e ley a drenta den vigor dia 1 di augustus ultimo.
Mientras e ley ta prohibi tur sorto di paña cu ta tapa cara riba transporte publico, den edificionan di gobierno, y institucionnan medico y di educacion, Achiume a bisa cu ‘e discurso politico rondonando esaki a laga cla cu muhenan moslim ta e obhetivo previsto’. El a agrega: “E ley aki no tin luga den un sociedad cu ta gaba su mes di promove igualdad di genero.”
Den un reporte preliminar despues di un bishita na Hulanda, Achiume tambe a menciona e asunto dificil di historia colonial Hulandes. El a bisa cu gobierno mester haci mas pa siña hende tocante e ‘historianan di sclavitud y colonialismo como historianan di subordinacion racial sistematico’.
Luna pasa, un museo na Amsterdam a dicidi di stop referi na siglo 17, tempo cu Hulanda tabata un super poder mercantil, militar y artistico, como e ‘Era di Oro’, bisando cu e termino ta ignora e ‘cantidad di banda negativo di siglo 17, manera pobresa, guera, labor forsa y traficacion humano’.
E decision a lanta reaccionnan fuerte, cu Prome Minister Mark Rutte, kende a studia historia Hulandes den universidad, yamando e movida ‘sin sentido’.
Den reporte di Achiume, despues di dianan di reunion cu oficialnan municipal y di gobierno, activistanan pa derecho y otro gruponan, Achiume a elogia gobierno Hulandes pa promove igualdad di genero y e derechonan di personanan LGBTI, y a urgi esfuersonan similar pa mehora igualdad racial y etnico. Lo publica e reporte final proximo aña.
Vocero di Ministerio di Asunto Social, Coen Gelinck a bisa cu gobierno Hulandes ta luchando pa un sociedad inclusivo, pero a reconoce cu ‘ainda tin trabou pa haci’.
Achiume tambe a haya bon e noticia cu e caracter tradicional pa mucha, Zwarte Piet, kende ta compaña Sinterklaas, a keda reemplasa den un celebracion nacional televisa otro luna cu un version di e caracter cu tin manchanan di roet riba su cara na luga di henter un makiyahe cu cara preto. El a bisa cu Zwarte Piet, kende a causa confrontacionnan den añanan recien entre activistanan contra y na fabor di dje, ‘ta incorpora e degradacion y deshumanisacion di stereotiponan racial tocante hende di color scur’.
Como ¼ di e 17 miyon di persona Hulandes a nace den exterior of tin sikiera un mayor cu a nace den exterior. Hulanda pa hopi tempo ta mira como un ‘melting pot’ multi- etnico exitoso, pero retorica nacionalista, anti- Islam y anti- inmigrante a aumenta den añanan recien.
Achiume a bisa cu e reputacion di Hulanda como un bastion di pensamento liber ta strobando progreso. “E paradox na Hulanda ta cu insistencia cu igualdad y tolerancia ta existi caba ta opera como un barera pa alcansa e igualdad aki den realidad”, el a bisa, agregando cu e reputacion di e pais pa tolerancia ta haci dificil pa ‘mobilisa e recursonan y accion necesario pa sigura igualdad, no-discriminacion y inclusion pa tur’.
