(NLTimes) – Institucionnan gubernamental tabata ciego pa hendenan y ley, destruyendo ciudadanonan den nan persecucion pa hendenan cometiendo fraude. E Gabinete y parlamento a faya residentenan Hulandes, e organisacionnan manera Belastingdienst a actua fuera di ley y e hudiciario no a ofrece ningun proteccion. Esaki ta loke e comite parlamentario a conclui den su investigacion tocante gobierno su politica di fraude.

E clima politico a bira asina dificil cu e persecucion di fraude aki a continua pa añanan largo sin ser mira, e comite a bisa.

“Den un clima social y politico cu a bira duro, 3 poder di e estado tabata ciego na tanto e hendenan como ley, causando e destruccion di bidanan,” e reportahe a nota, cu referencia na e brasanan ehecutivo, legislativo y hudiciario di gobierno. “E ta doloroso cu e sistema di siguridad social y beneficio cu tabatin e funcion di sostene pueblo a destrui e mesun pueblo aki.”

E reportahe ta pinta un clima politico den cual casi tur agencia y organisacion cu tin contact oc u ciudadano a causa di beneficionan y zaakgeld a comete eror tras eror. Politiconan a crea mal leynan y a fracasa den mehora esaki. Organisacionnan di implementacion manera Belastingdienst inhustamente a acusa ciudadanonan di fraude pa añanan largo. E hudiciario a mantene reglanan cu tabata demasiado estricto pa demasiado tempo y ciudadanonan no a ricibi un chens pa defende nan mes contra e inhusticia cometi contra nan.

E comite a menciona e ley di aña 2005 pa bijstand di cuido, pa muchanan y pa vivienda, cual ta cubri mas o menos 8 miyon persona cu bijstand mensual como un ehempel. Segun e comite, gobierno a haci un “acumulacion di mal decision” den e ley aki, algun cual no a ser rectifica casi 20 aña despues.

A causa di su tamaño grandi, e ley no ta presta suficiente atencion na proteha e ciudadanonan. Belastingdienst a keda encarga di e implementacion, un autoridad cu ta custuma di colecta placa no paga esaki y ken su sistema di IT no por a handle e sistema di bijstand en general. Belastingdienst a usa pagonan avansa, cual ta nifica cu e ciudadanonan mester a calcula nan mesun ingreso sin cu nan tabata sa exactamente kico ta conta bao “ingreso”. Tampoco no tabatin e posibilidad di desvia for di e reglanan aki y no tabatin claridad tampoco riba kico exactamente un ciudadano mester haci pa paga back loke el a ricibi.

Como resultado di esaki, hende a perde henter nan bijstand pa e eror mas minimo, manera un number fout den e fecha di nacemento di un yiu. “Esaki a causa un metodo di ‘all or nothing’ cual a destrui e bida di hende,” e comite a conclui.

Un ley manera esaki por causa un “cadena di consecuencia pa hende” a causa di tur tipo di eror, e comite a splica. Y e personanan kendenan ta sufri e daño ta e personanan mas vulnerabel den sociedad, esnan cu tin mester di e bijstand y viviendanan di ingreso abao ta ricibi e golpi mas fuerte ora cu nan mester paga esaki back.

Durante e ultimo añanan, tabatin varios indicacion cu e legislacion y regulacionnan den e area aki no tabata adecua segun e comite. Conseho di Estado, Asociacion di Municipalidadnan Hulandes y Ombudsman Nacional tur a señala na esaki. Sinembargo gobierno “no a tuma e problemanan aki na serio y cambio e ley fundamentalmente,” e comite a splica.

E hudiciario tambe a fracasa, segun e comite. Conseho di Estado, Hulanda su corte administrativo mas halto, a aproba e metodo aki pa añanan a pesar di ta al tanto di su “consecuencianan desastroso.” Parlamento tampoco no a haci nada. “E mayoria di parlamento a fracasa den su tarea legislativo y di supervision,” e comite a critica. Tweede Kamer a aproba e gabinete su “mal leynan” y a faya den coregi e erornan. Esaki ta haci Tweede Kamer parcialmente responsabel pa e victimanan su miseria.

E investigacion parlamentario ta e instrument investigativo mas fuerte disponibel pa parlamento. Esaki ta sigui un investigacion anterior tocante e scandal di bijstand den cual Belastingdienst inhustamente a acusa miles di mayor di fraude cu e bijstand pa mucha y a duna ordo pa nan paga back loke nan a ricibi. Varios a ser laga den ruina financiero y miles di mucha a ser saca for di nan hogar a causa di esaki. Den aña 2021, e investigadornan a conclui cu gobierno a haci un cantidad grandi di inhusticia na e mayornan aki, cual a causa e collapse di e gabinete Rutte III.