Den nos ultimo edicionnan, Bon Dia Aruba a bin elaborando ariba e recomendacionnan presenta den e rapport “Level Playing Field”. Un total di 17 recomendacion a ser presenta den e rapport pa introduccion di e sistema di BTW, cu despues a cambia y a bira BBO na frontera. Sinembargo, AHATA, hunto cu algun otro stakeholder comercial y sindical, a aclaria cu nan no ta apoya ni aproba e rapport aki.

E “Level Playing Field” rapport a ser elabora pa un comite di tres experto. AHATA hunto cu e otro stakeholders no tabata di acuerdo cu dos di e miembronan di e comision aki y tampoco tabata di acuerdo cu e proceso cu a tuma luga pa crea e lista di recomendacionnan.

Sinembargo Camara di Comercio a entrega e rapport aki na Gobierno di Aruba y Prome Minister, Evelyn Wever-Croes, a remarca cu Gobierno di Aruba lo sigui trata e rapport “Level Playing Field” di 25 di oktober 2022, como un rapport di recomendacionnan di gremionan comercial y sindical, y lo sigui evalua e recomendacionnan cu por wordo sigui.

Den e articulo di awe nos lo sigui elabora ariba e recomendacionnan cu e rapport ta sugeri na Gobierno di Aruba.

Abstene di introduci e regulacion di salario ficticio

E comite di experto ta indica cu tin diferente consideracion pa abstene di introduci e regulacion aki cu ta un concepto totalmente desconoci pa e comunidad comercial na Aruba y cual lo por crea diferente dificultad cu ta bira dificil pa resolve.

Por ehemplo, nan ta splica cu tin un cantidad di compania inactivo registra na Camara di Comercio. Doñonan ta keda cu nan pa oportunidadnan di negoshi cu por presenta eventualmente cu ta rekeri di un necesidad rapido pa un compania responsable limita. Segun e comite mester tin un periodo di adaptacion y legislacion pa permiti likidacion rapido di companianan inactivo of un regimen di inmunidad y un censo prome cu e implementacion di un legislacion asina y no despues.

Tin un cantidad halto di companianan chikito cu doñonan ta ganando un salario modesto, of tin biaha nan no tin salario mes, pa periodonan largo di tempo, pa yuda e fluho di cash di nan compania mientras nan ta paga e prima- y impuestonan y no colecta un salario netto ora cu tin mester di cash.

“Companianan ta cuminsa pa dura y triunfa cu tempo,” e comite ta remarca. Segun nan e carga di costonan modesto di e doño pa e recursonan di e companianan ta un comportacion di aplaudi y no pa ser penalisa.

E comite ta enfatisa cu implementacion di e regulacion Hulandes y copia esaki pa economia chikito di Aruba sin ningun campaña adecua pa permiti e likidacion rapido y menos costoso di companianan inactivo y cambionan cultural pa entrepreneurnan ta bay sigura un implementacion costoso y hopi dificil.

Reforma fiscal ta implica simplificacion di administracion di impuesto pa e ciudadanonan y entrepreneurnan y e impuesto di salario ficticio ta un proceso contrario. E comite ta bisa cu simplemente mester limita e averahe di balans di cuenta coriente di manager y stakeholders, y cualifica e exceso como dividendo disfrasa.

Cambio den impuesto pa e sector di joyeria

E comite di experto ta indica cu e sector aki a expresa nan preocupacion serio tocante nan opcion pa absorbe cualkier aumento den impuesto di benta, ya cu nan prijs di benta ta ser fiha pa e marcanan, manteniendo e mesun prijs di benta na tur destinacion den Caribe manera un solo mercado sin competencia insular.

Un analisis di mercadeo reciente di ATA ta pone compras na un posicion halto di atraccionnan di Aruba pa bishitantenan afluente. E comite ta remarca cu e sector aki ta provee empleo y salario stabiel, cobransa di cambio di moneda y ingreso pa cobransa di transaccion na e banconan local riba transaccionnan di credit card, mientras cu e propiedadnan cu e negoshinan aki ta huur of ta doño di dje ta localisa na e localidadnan clave, pa ta facilmente accesible pa e bishitantenan.

Nan tin un efecto considerable di multiplicacion grandi den e otro sectornan y den e ingreso fiscal den e sectornan aki. E comite ta recomenda cu un especie di administracion di zona di comercio liber manera den legislacion BES por ser considera, habilitando e sector aki pa keda competitivo pero contribuyendo nan parti.

Cumplimento cu Duana

E comite di experto di e rapport ta indica cu gremio comercial y sindical ta propone un procedura fluido di tempo efectivo na momento di importa. Prome cu tur cos, nan ta propone pa mitiga e cantidad di categorianan den e terminologia di 12 te cu 5. Esaki, segun nan, lo mehora cumplimento y documentacion di importacion di auditoria y eficiencia di aplicacion na e sitio pa departamento di Duana.

Cobro di un tarifa pa yena e formulario di Asycuda na importacion tambe ta ser considera como promocion di un miho calidad di presentacion. Den e rapport, gremio comercial y sindical ta recomenda pa tin tarifanan integral relaciona na elementonan cu ta ser intercambia hunto.

E comite ta duna como ehemplo muebles y accesorionan importa pa hotelnan, tiendanan di muebles y fabricantenan di mueblenan di oficina mester tin tarifanan mas parecido cu ta posible di por ehemplo lampi, muebles, decoracion di arte, tapijt etc.

E sugerencianan aki, nan ta remarca, ta pa facilita administracion y cumplimento di importacion pa mehora colecta. Tanto SADA como Departamento di Douane ta afirma cu tin escasez di personal cualifica den e departamento y cualkier proceso pa simplifica e proceduranan y facilita trabao di cumplimento lo beneficia di ingreso fiscal optimal.

P’esey e comite ta subraya cu modernisacion di e legislacion door di reemplasa e anticua LUID 1908 den ALDA, lo faborece tambe miho autoridad na Duana pa traha mas eficiente y efectivo, mas ainda ora cu un BBO na frontera ser introduci. Duana ta sigur cu un legislacion actual y e herment di cumplimento TTP nan ta bay ta den forma, dispuesto y capaz pa combati facturanan fraudulento miho y genera mas ingreso pa Gobierno di Aruba.