Den nos edicion di Bon Dia Aruba di ayera, a elabora ariba tres recomendacion, di e 17 recoemndacionnan, presenta den e rapport “Level Playing Field”. E recomendacionnan aki tabata abstene introduccion di salario ficticio, cambio di impuesto den sector joyeria y cambionan pa mehora cumplimento cu Douane. Den nos edicion di awe nos ta elabora ariba ultimo recomendacionnan di e rapport aki.

E rapport “Level Playing Field” a ser comisiona pa un grupo di stakehodler di e gremio comercial y sindical pa brinda recomendacion na Gobierno di Aruba ariba introduccion di BTW, cual na final no a ser introduci y a opta pa introduci BBO na frontera na su luga. Un comite di tres experto a keda encarga cu e tarea aki

Mester remarca cu den e gremio comercial y sindical tabatin desacuerdo alrededor di e rapport. AHATA, entre otro stakeholder, a indica cu nan no ta di acuerdo ni aproba e rapport pasobra nan no ta di acuerdo cu dos di e miembronan di e comite di experto ni tampoco tabata di acuerdo cu e proceso cu a tuma luga pa crea e lista di recomendacionnan.

Sinembargo Camara di Comercio a entrega e rapport aki na Gobierno di Aruba y Prome

Minister, Evelyn Wever-Croes, a remarca cu Gobierno di Aruba lo sigui trata e rapport “Level

Playing Field” di 25 di oktober 2022, como un rapport di recomendacionnan di gremionan

comercial y sindical, y lo sigui evalua e recomendacionnan cu por wordo sigui.

Impone un impuesto di seguro

E comite di experto ta indica cu e delegadonan di e impuesto di seguro ta considera impone un impuesto di seguro di 6% enbes di e BBO of BTW. E impuesto aki lo ta ariba tur polisa menos polisa di bida, anualidad y impuesto di vehiculo.

Recomenda reforma pa reduci e costo di haci negoshi y reduci e tape cora

Den e recomendacion aki e comite di experto tin diferente subrecomendacion pa diferente area y sector.

Recolleccion di tarifa di Serlimar a traves di e recibo di coriente

E comite ta recomenda pa subcontracta e coleccion di e recibonan di Serlimar a traves di e recibo di Elmar, manera Corsow ta haciendo pa e ultimo 25 aña. Pa un igualdad di condicion, gremio comercial y sindical, cu e tecnologia di awendia, ta sugeri pa e companianan cu ta recoge sushi transferi nan recolleccion pa Elmar, cu despues ta transferi e pagonan aki pa e companianan en cuestion.

Implementacion di deposito ariba boter, taira, vehiculo y otro productonan grandi

E costo di procesa sushi ta relaciona bastante cerca na e naturalesa di e productonan cu a ser importa. Por ehemplo, un vehiculo di motor, of taira di un truck, ta productonan cu tin un costo di transportacion y pa kitanan for di nan localidad pa uso final. Otro productonan di consumo masivo, manera boternan di bebida ta wordo tira afo facilmente y ta causa polucion na e isla cu ta depende di limpiesa pa sobrevivi den e industria di turismo.

E comite di experto ta indica cu si un deposito ser aplica pa cada unidad na importacion, companianan di recogemento priva por organisa sistemanan di recolleccion y transporta e productonan aki pa nan plantanan di proceso desgina, y spaar asina e costo di transport. E fondo di deposio ta debolbe e placa pa e collector di sushi di e localidad di ultimo uso. E producto mester wordo fisicamente modifica of demantela.

Incumplimento cu impuesto di vehiculo

E comite ta remarca cu considerando e ultimo cifranan di no cumplimento cu e impuesto aki di Departamento di Impuesto, e gremio comercial y sindical ta recomenda inclui e impuesto aki den e impuestonan special di gasolin y diesel, evitando asina e renobacion di plachi di number y enforsa control pa polis. Na mesun momento, mester tin e diesel mara na e impuestonan special manera gasolin.

Nan ta splica cu e contaminador y chauffeur ta paga pa e mantencion di e cayanan. Na mesun momento, esaki por sirbi como incentivo pa menos hende corre auto y empleadonan di e sector hotelero cu ta biba leu, por usa lift pa yega trabao (carpool).

Recollecion di procesamento di awa residual a traves di e recibo di awa

E planta di procesamento di awa sushi ta duna un holo insoportabel den e area di Eagle Beach. E ta afecta e propiedadnan bisiña y e imagen y percepcion di e producto di turismo y calidad di bida di e habitantenan. E awanan parcialmente procesa ta un menasa, den tempo di awasero fuerte, pa e lamanan cu ta cerca, cu aworaki ta famoso mundialmente.

E comite ta enfatisa cu el a bira un situacion di riesgo halto pa henter e economia di Aruba y mester un solucion urgente. Tin 550 camber den proceso na menos di 100 meter leu di Bubali plas.

Pa sigura un financiamento a largo plaso y estable pa futuro inversionnan, pa mantene y mehora e planta, e comite ta recomenda pa subcontracta e maneho pa un compania profesional y cobra, a traves di e recibo di awa y basa ariba e volumen di e awa usa, e costo di expansion y operacion di e planta di awa sushi, cuminsando for di e suposicion di un planta cu tin full e capacidad pa handle e volumen actual y den futuro, te cu 50 aña den futuro.

E comite ta indica cu e principio “e contaminador ta paga” ta aplica pa e usuarionan halto, cu excepcion di agricultura y fabricacion cu ta realisa nan propio purificacion di awa. E entidad cu sistemanan completo di reciclahe di awa por obtene inmunidad tambe. Awa recilca por ser bendi pa hardineria, canchanan di golf y agricultura.

Stop di describi actividadnan detaya cu lo ser ehecuta ariba tereno gehuur

Cada bes mas tereno comercial pa huur a largo plaso cu descripcion detaya di e actividadnan economico ta ser afecta pa desbentahanan legal obsoleto cu ta reduci e balor di propiedad y afeceta nan posibilidad di financiamento den e mercado di credito.

Cambionan den economia y mercado den e localidad tambe por causa cu un negoshi ta bira no competitivo door di cambionan di ruta, invasion di poblacion y e necesidad di cambio den nan actividad pa nan por sobrevivi.

Por ehemplo un cunucu, supermercado of un fabrica cu buya y emision por ser rondona lentamente pa e poblacion y no por continua despues di tempo sin conflicto cu e bisiñanan. Of e balor di e tereno ta aumenta asina hopi cu otro uso ta factibel mas.

E comite ta subraya cu cambio di obhetivo di un tereno pa huur a largo plaso ta tuma añanan y e ta reduci e balor di benta di e propiedad den wowo di banco y futuro cumpradonan. E ta un perdida financiero pa e doño pasobra e cambio den obhetivo y su procesonan ta ser desconta for di e prijs.

Nan ta agrega cu e permiso di establecimento basa riba e opcionnan di uso di tereno di ROP(V) ta adaptabel cu tempo y no ta stroba e balor di e propiedad

Nan ta recomenda pa simplifica e denominacionnan pa uso di terneo comercial pa huur a largo plaso. Esaki ta delega e escogencia di actividad permiti pa e Departamento di Asuntonan Economico y DOW cu lo test e cambio den e propiedad pa e ley existente, e impacto ariba e ambiente y politica di e tempo, cu definicion dinamico y cu lo cambia cu tempo. Segun e comite e cambio por ser ehecuta cu un simpel enmienda di un solo biaha den e ley.