E relato di parti di ministerio di Infrastructura y Medio Ambiente riba e rapport pa soluciona e problema di desperdicio na Aruba, lo conseha di no cera Parkietenbos completo.
Den e relato cu ta anuncia cu e grupo di trabou a entrega nan rapport final na e minister encarga, por lesa cu ‘cierto sushinan lo mester bay Parkietenbos’. Esaki consehero di Ministerio di Infrastructura y Medio Ambiente Robert Kock ta bisa. E ta splica cu ‘e opcionnan a base di termino cortico ta cu e landfill lo wordo cera mas pronto cu ta posibel y cu sushi di mas lo mester wordo manda otro caminda’. Pero despues e ta bisa cu cierto sushinan lo mester bay Parkietenbos, pero mester haci esaki den ‘un forma cu e ta trece menos molester cu ta posibel pa bisiñanan y trahadonan’.
Cua sushinan lo keda bay Parkietenbos no ta conoci. Bon Dia lo purba di haya un copia di e rapport pa analisa e proposicionnan pa soluciona e asunto di desperdicio na Aruba. Minister encarga Otmar Oduber (POR) a priminti na december di cera e dump dentro di 90 dia, momento cu a instala e grupo di trabou.
Segun e relato cu nan a manda ayera nan a traha riba un ‘compilacion di posibel solucionnan cual ta encera leynan actual, leynan cu mester bin ainda, posicion di Serlimar entre otro’. “E ta un rapport basta amplio y integral, pa cual ta spera cu e informacion por wordo uza pa trece solucion pa e maneho di desperdicio aki na Aruba,’ sr. Kock ta enfatisa.
E relato ta informa cu awor minister Oduber lo repasa e rapport hunto cu e ministerio y tuma un decision riba e proposicionnan den e rapport.
