Ayera Minister di Asuntonan Economico y Clima (EZK) di Hulanda, Rob Jetten, a presenta na Tweede Kamer e rapport di transicion di energia cual ta basa riba e investigacion cu el a pidi TNO pa haci tocante e transicion di energia na Aruba, Corsou y Sint Maarten, pa e apertura plania di SDE++ den e parti aki di Reino.
Den e rapport aki, TNO ta discribi e suministro actual di elektricidad na e paisnan, e plannan di e paisnan pa logra mas sostenibilidad den produccion di electricidad y mobilidad y na mesun momento ta duna un bista di e opcionnan pa logra un suministro di energia completamente renobabel na e paisnan.
Den e investigacion aki, TNO a usa documentacion y plannan di e paisnan mas tanto cu ta posibel y e informacion a wordo colect via casi 40 entrevisa cu gobiernonan local, companianan di gobierno, empresanan priva y otro stakeholders relevante.
E rapport ta indica cu na Aruba, actualmente mas o menos 20% di e electrecidad produci ta bin di fuente renobabel. Esaki ta basa riba un parke di biento cu ta provee alrededor di 15% di e produccion di electricidad y di panel solar, cu ta provee mas o menos 5%. E mayoria di e energia solar ta bin di generacion decentralisa cu panel solar riba dak. E resto ta bin di e dos parke solar mas grandi cerca di aeropuerto y e refineria antiguo. Debi na e aumento di generacion y subministracion di energia solar riba dak, ta keda presion riba e red di tension abou y ta surgi problema di tension den algun barionan.
TNO ta señala cu tin un aumento tambe den e uso di transporte elektrico na Aruba. Pa september 2023, aproximadamente 650 di e total di 90,000 autonan na Aruba ta electrico. Nan ta indica cu gobierno ta enfoca riba un crecemento continuo di transporte electrico, incluso pa e busnan di transporte publico y pa e autonan di huur riba e isla.
Nan ta resalta cu pa e cantidad creciente di auto electrico, infrastructura di carga ta necesario y tambe mester ta sigur cu e red di electricidad por soporta esaki. Mas den futuro ta sigui electrificacion (parcial) di transporte maritimo (crucero) y aereo, cu por tin un efecto significante riba e sistema di electricidad via demanda di electricidad halto.
Pa loke ta e e politica di energia di Aruba, TNO ta resalta den nan rapport cu esaki ta bay pa un aumento di e porcion di energia renobabel pa 50% den 2030. E ampliacion di capacidad di biento y e remplaso di e turbinanan actual pa turbinanan nobo y mas grandi ta forma e centro di esaki. Cu un ampliacion den e megwatts, ta spera cu un parti comercial lo inverti den e parke di biento y bende e coriente via un ‘power-purchase-agreement’ na compania di energia WEB Aruba N.V.
Plannan pa un ampliacion anterior di energia di biento a wordo anula den 2018 despues di casonan na corte instiga pa residentenan cerca di e localidad plania pa esaki. Pa e plannan actual, TNO ta splica den e rapport, nan ta bishitando e localidad di y rond e parke di biento existente, cu ta situa mas cu 850 meter for di e area habita, segun politica Arubano. Apoyo di e poblacion local ta keda un punto di atencion, specialmente mirando e importancia di energia di biento den e ambicion di Gobierno di Aruba.
Apart di biento, TNO ta remarca cu e meta di e politica di energia y e compania di Utilities Aruba NV ta pa logra 15 MW adicional di panel solar fotovoltaico (zon-PV) den e añanan benidero, cu ta conta pa mas o menos 2.5% di e produccion di electricidad.
Nan ta agrega cu tambe tin necesidad pa 10-20 MW (30-40 MWh) di almacenamento di bateria pa e integracion di e porcion mas halto di electricidad renobabel. Apart di e ampliacion di solar PV grandi, ta spera cu solar panels riba dak lo sigui aumenta, parcialmente debi na e deseo di minister di Desaroyo Economico pa un transicion di energia inclusivo, pero pa logra mas solar panels riba dak, ta crucial pa inverti den e red di electricidad.
TNO ta remarca den e rapport cu e sostenebilidad continuo di e produccion di electricidad na Aruba ta limita pa e contract firma pa LNG. Nan ta resalta cu tin poco informacion publico tocante e acuerdo di suministro di LNG. Di e entrevisanan cu nan a realisa nan a compronde cu tin un acuerdo di ‘take-or-pay’ pa un cantidad di LNG cu ta cubri mas o menos 50% di e produccion di electricidad y cu e contract tin un duracion di 20 aña. Esaki ta nifica cu te 2046 of 2047 lo tin costo adicional pa aumenta e porcion di electricidad renobabel mas halto ku 50%, debi na cu e LNG lo mester wordo paga mescos si e consumo ta baha.
Despues di 2047, nan ta resalta, e porcion di energia renobabel por aumenta cu mas energia di biento of energia solar. Na esaki, agrega na esaki e espacio limita disponibel na Aruba ta un factor limitativo. Un sistema cu solamente energia di biento y energia solar ta pidi un capacidad excesivo pa logra 100% energia renobabel, specialmente pasobra durante 2-3 luna pa aña no tin casi biento na Aruba.
Hidrogeno ta wordo considera den un periodo largo como un alternativa flexibel y pa backup di produccion di electricidad. E plannan pa hidrogeno no a wordo desaroya hopi leu ainda, solamente te na un MoU firma pa gobierno y un compania Spaño (ACCIONA Energia) pa desaroyo di un proyecto di electrolisis cu ta combina cu 50-60 MW solar PV.
E transicion di energia na Aruba por ta organisatoriamente mas complica cu na Corsou y Sint Maarten. E rason principal pa esaki ta cu e produccion y transporte di electricidad ta wordo haci pa dos compania diferente, WEB Aruba NV y ELMAR NV.
E organisacion riba WEB y ELMAR ta Utilities Aruba N.V. y normalmente tin e responsabilidad pa e cooperacion entre e tres compania di Estado. E colaboracion aki ta determina un parti grandi di e politica di energia. TNO ta remarca cu un colaboracion estrecho entre e tres compania di estado ta necesario, pasobra e transicion di energia ta pidi un planeamento integral di e generacion di energia renobabel den combinacion cu e ampliacion di e red di electricidad.
