Recientemente, Secretario di Estado, Alexandra van Huffelen a presenta na Tweede Kamer e resultado di e rapport ‘Beleidsevaluatie Protocollen Aruba’, un revision di politica pa e periodo di 2016-2022 pa paisnan Aruba, Corsou y Sint Maarten. E rapport aki ta elabora ariba e metanan cu Aruba a cumpli, no a cumpli of cu a logra realisa parcialmente.

Den luna di mei 2015, Aruba y Hulanda a yega na acuerdonan pa introduci supervision riba e finanzas publico di Aruba. Den e mesun aña Landsverordening Aruba financieel toezicht (LAft) a bira vigente y a establece e College Aruba financieel toezicht (CAft).

Na november 2018, Aruba y Hulanda a acorda pa continua cu e supervision financiero y a establece normanan nobo pa finanzas di gobierno. E acuerdonan aki a prolonga den januari 2022 te na final 2023. E acuerdonan for di 2015, 2018, y 2022 ta conoci como e Protocolnan Aruba-Hulanda.

Mescos cu e Rijkswet financieel toezicht di Corsou y Sint Maarten, LAft ta regula e proceduranan relaciona cu e presentacion (pa Aruba), y asesoramento (pa CAft) riba e presupuesto, e ehecucion di e presupuesto, mehoracion di e maneho financiero, e capacidad di e Rijksministerraad pa duna directiva, y e apelacion. E LAft ta regula e establecimento di e CAft, den espera di e establecimento di un Camara di Presupuesto Arubano y te ora un balans financiero sostenible wordo logra.

E rapport ta splica cu e normanan for di e Protocolnan ta enfoca ariba converti e deficitnan financiero den saldo positivo, logrando un tendencia structural descendente den e desaroyo di e ratio di debe pa un tamaño sostenible y reduci e gastonan di personal. Tambe a haci acuerdo ariba e evaluacion di e Protocol di 2018 y CAft, e posibilidad di registro di parti di Hulanda riba prestamonan di Aruba, e preparacion pa un Camara di Presupuesto cu lo tuma over e tarea di CAft, mehoracion di e maneho financiero y pa evita e obligacionnan di Public Private Partnership.

E Protocolnan tabatin como obhetivo logra resultadonan politico directo, efectonan social y consecuencianan riba termino largo. Pa medio di analisis di hecho, analisis cuantitativo y analisis cualitativo, a investiga na ki grado e obhetivonan a wordo logra, kico tabata e contribucion di e Protocolnan pa logra e meta y na ki grado e tabata eficiente.

E rapport ta remarca cu fuera di e periodo di Covid, Aruba a cumpli, cu e normanan den e Protocol di 2018 y a cumpli di forma limita cu e normanan di e LAft. Durante e crisis di Covid, Rijksministerraad a permiti Aruba pa desvia di e normanan. Desde e establecimento di e supervision financiero na 2015, e realisacionnan tabatin casi semper mas beneficio cu e presupuestonan. E Protocolnan ta efectivo di forma limita ora ta trata di e resultado directamente desea di e politica.

E rapport ta indica cu na 2019, Aruba tabatin un saldo di fiansa cu tabata mas beneficioso cu e normanan segun e Protocol di 2018, pero di 2020 te 2022, e saldo tabata menos beneficioso como consecuencia di e crisis di Covid. Rijksministerraad a vota riba peticion di Aruba pa desvia di e normanan den e Protocol di 2018 y den e LAft pa motibo di e efecto di e crisis di Covid. Na 2019, e ratio di debe ya a baha na 71%, un porciento mas halto cu e norma pa 2027. Tanto realisacion di meta como efectividad a ser realisa.

E ta señala cu Aruba a cumpli cu e normanan financiero pa e presupuesto den e LAft den tres di e cuater añanan. E normanan cualitativo pa e presupuesto – completacion, adaptacion, orden y controlabilidad – a wordo realisa, pero di forma limita.

E rapport ta agrega cu Aruba a keda bao di e norma pa gastonan di personal di 479 miyon florin cada aña, pero a realisa un aumento den gastonan di personal na 2022, mientras cu e norma ta prescribi un caida nominal cada aña. Tanto e meta como efectividad a wordo realisa di forma limita.

Segun e rapport, for di 2015, pais Aruba a logra realisacionnan cu tabata mas beneficioso cu e presupuestonan, den totalidad di 1.9 biyon florin. Segun CAft, e realisacionnan aki por tabata mas halto.

For di e acuerdo di 2013 tocante e posibilidad pa Hulanda suscribi riba prestamonan di Aruba y e reafirmacion den e Protocolnan, ningun inscripcion no a tuma lugar. Den esaki Aruba no a logra realisacion di meta ni efectividad.

E rapport ta subraya cu e cuenta anual mas recien di Aruba ta di 2018. E acuerdo tocante e declaracion di accountant ta referi na aña 2020, pa cual no tin un cuenta anual ainda. Sinembargo, e sistema financiero necesario pa e declaracion di accountant ta cla, cual ta indica cu Aruba a cumpli cu e meta aki di forma limita tambe.

Aruba no a bay den ningun obligacion di PPP nobo desde cu a introduci e acuerdo den e Protocol di 2018. E meta aki si a wordo realisa.

Aruba no tin ainda su propio Camara di Presupuesto cu ta bay tuma over tareanan di CAft. No tin realisacion di meta ni efectividad, a pesar cu preparacionnan a tuma lugar.

Pa loke ta e obhetivo di mehora e maneho financiero, e rapport ta enfatisa cu esaki no a ser realisa. Como consecuencia di esaki, e maneho financiero di Aruba ta keda debil. Informacion di ehecucion y rindimento di cuenta ta yega laat hopi biaha, Aruba ta atrasa cu e cuentanan anual y e informacion den nan no ta suficientemente confiabel. No tin realisacion di meta ni efectividad. Bon maneho financiero ta un condicion esencial pa realisacion di e obhetivonan di politica.

E supervision financiero ta duna un contribucion importante na transparencia tocante e finanzas di gobierno. Esaki ta permiti cu Parlamento di Aruba por haci uso mas efectivo di nan derecho di presupuesto. Tambe e ta duna un contribucion na e funcionamento di e institucion democratico. Tin efectividad, pero e realisacion di meta ta limita pa motibo di e atraso di Aruba cu e cuentanan anual.

Pa loke ta e efectonan social desea, e rapport ta indica cu esaki a wordo realisa di forma limita. Te 2022 no a logra un reduccion di e debe nominal. E ratio di debe ta mustra un tendencia di caida for di 2017, sin inclui 2020 ora cu e crisis di Covid a causa un aumento fuerte.

E consecuencianan den termino largo desea di finanzas publico sostenibel y desaroyo structural civil-economico parcialmente limita y parcialmente logra. Tin efectividad limita. Aunke e ratio di debe a baha, esaki a keda riba e limite critico cu IMF a menciona pa e region y riba e anker di debe cu IMF a calcula pa Aruba durante e periodo total.

No obstante, e rapport ta menciona, e ratio di debe di Aruba no a desaroya den un manera no sostenibel: a pesar di e interes mas halto cu Aruba ta paga compara cu Corsou y Sint Maarten, e crecemento di GDP relativamente halto y e saldo primario positivo durante e periodo sin shocknan externo ta garantisa cu e ratio di debe ta mustra un tendencia di caida. Aunke e Protocolnan y e supervision financiero a contribui cu e logro parcial di e normanan financiero, tin solamente realisacion di meta limita y efectividad limita.

Excluyendo e añanan den cual Aruba a sufri pa e efectonan di e crisis di Covid, Aruba a conoce un crecemento real economico faborabel for di 2015, cu ta mas halto cu e promedio Caribense. E desempleo di Aruba ta mustra un tendencia di caida y ta rond di e nivel di e promedio Caribense.

E rapport ta remarca cu tin realisacion di meta. Sin e Protocolnan y e supervision financiero, e finanzas publico lo a desaroya den un manera menos faborabel y e gastonan di interes mas halto lo a bay na gasto publico y otro inversionnan publico productivo. E rapport ta enfatisa cu no tin efectividad completo pasobra e normanan financiero di saldo positivo riba e saldo di gobernacion por tin un efecto no faborabel, riba desaroyo civil-economico. Riba e aspecto aki, e Protocolnan ta efectivo di forma limita.