Diahuebs ultimo, miembronan di fraccion di MEP a entrega un rapport na Ministerio Publico (OM) pa e instancia aki inicia un investigacion forma riba un serie di casonan cu nan ta bin denunciando.
Nan a logra compila tur documentacion pa duna base na e investigacion aki. Den caso cu esaki no ta tuma luga, nan lo considera pa bin cu un encuesta parlamentario.
Parlamentario di e fraccion aki, Endy Croes ta bin denunciando sistematicamente diferente asunto cu e ta haya cu ta merece un investigacion. Ya cu awor si nan tin acceso na diferente documentacion. Na inicio di aña aki den su tarea como parlamentario, el a haci pregunta riba e auto di carera Team Aruba cu ta core na Merca. Un di e contesta cu nan a haya for di ATA ta cu a patrocina e auto aki cu 1.6 miyon florin. Kiermen 22.500 pa luna pa 72 luna largo. Segun e parlamentario, aworaki ATA kier defende su mes cu e balor cu nan a inverti ta bale la pena, ya cu alrededor 14 mil hende ta bay wak carera cada biaha. Nan ta un publico cu entrada halto. Pero den todo caso, parlamentario Croes ta considera e contesta di ATA inaceptabel.
E tin su duda, y pa e motibo ey e lo bin cu mas pregunta pa ATA, pasobra nan no ta di acuerdo tampoco cu e forma con e instancia aki ta substancia nan mes un abuso di e manera aki.
Parlamentario Croes ta considera cu cosnan asina mester wordo coregi y nan lo sigui trece dilanti esaki. “E ta increibel cu nos por traga e tipo di maneho asina”, el a bisa. Tambe el a bisa cu Team Aruba a haya patrocinio di Triple A (aeropuerto) y den futuro cercano e lo bin cu informacion pa prensa riba e asunto aki tambe.
E ta reconoce cu no tur hende kisas no ta aprecia e manera cu nan ta hiba politica. Pero el a priminti comunidad durante e temporada cu el a haci campaña pa averigua kico a pasa cu nan placa den gobierno anterior. Esaki considerando e aumento di nos debe nacional di 43% na 2009 y awor e organo di supervision financiero Caft a anuncia dia 3 di februari ultimo, cu esaki a alcansa 87%.
