Un rapport di Amnesty International tocante e situacion di refugiado Venezolano na Aruba a causa bastante atencion internacional, y no den sentido positivo pa nos isla. Manera nan a describi esaki, e organizacion ta yega na varios recomendacion pa mehora e situacion di e refugiadonan Venezolano na Aruba, specificamente pa loke ta e trato incorecto y inaceptable cu segun nan gobierno di Aruba ta duna e migrantenan aki. Ta importante si pa mantene obhetividad den e asunto aki, pasobra no tur cos treci dilanti ta coresponde cu realidad. Obhetividad ta obliga nos di otro banda contempla e cosnan cu gobierno no ta atendiendo bon y cu en berdad mester mehora.
Na promer lugar e grupo di refugiado. Ken ta refugiado? Esun cu yega na nos teritorio y na promer ocasion ta presenta nan mes dilanti autoridad pa pidi asilo. Esey ta e caso den mayoria di e 17.000 persona di nacionalidad Venezolano cu ta na nos teritorio indocumenta? No, mayoria di nan a drenta via aeropuerto como turista y no a sali mas. Eseynan no por reclama status di refugiado despues, punto. Gobierno tin tur nan datonan den forma digital. Ademas, esun cu a drenta Aruba via otro pais lo mester a reclama asilo na e pais ey. Como cu biahe directo entre Venezuela y Aruba ta imposible desde 2018, esun cu a yega despues di e fecha ey a yega aki via otro pais. E minoria cu a logra drenta Aruba via lama, den cierto caso ta keda aresta di biaha, otro ta logra scapa y ta desaparece riba nos isla. Ta solamente esnan captura di biaha y cu ta duna di conoce di biaha cu nan ta desea di haci uso di e derecho di pidi asilo, ta bin na remarca pa esaki. Bo no por warda te dia den un of otro control autoridadnan pone man riba bo pa bo reclama e supuesto ‘derecho di asilo’. Den e sentido aki loke Amnesty ta formula ta exagera, e grupo di refugiado no ta e 17.000 menciona. Tambe e publicacion ta crea e impresion cu tin un centro di detencion pa refugiado. Esey no ta e caso, e gran mayoria di persona indocumenta ta biba ‘somewhere’ na Aruba, unda nos hendenan a haci un ‘tremendo trabao’ di yuda e persona indocumenta di ta invisible. Nos no tin un situacion manera na otro pais den nos region unda migrante Venezolano practicamente ta biba riba caya.
Di otro banda, e organizacion ta denuncia cu gobierno no ta percura pa duna e migrante captura e posibilidad pa pidi asilo durante nan detencion. Esey ta un derecho internacional cu mester respeta, asina simple. Ta na gobierno pa duna cuenta kico ta berdad o no berdad den esaki. Otro keho cu Amnesty tin ta e atencion na situacion di mucha entre e migrantenan. Tin regla special pa respeta den esaki, entre otro cu gobierno ta obliga, mientras nan ta den nos teritorio, pa nan haya educacion te dia nan eventualmente bandona nos teritorio. Esaki no ta un tema nobo, pasobra den pasado tabatin caba problema pa convence e sector di educacion cu gobierno por hasta obliga e scolnan cu no kier coopera pa acepta mucha indocumenta. Tambe, si no tin condicion aceptable pa mantene e muchanan cerca nan mayornan, autoridadnan encarga cu custodia di mucha lo mester asumi nan responsabilidad y percura pa e acomodacion adecua.
Mester bisa tambe cu gobierno tabatin e problema di exposicion negativo den prensa internacional cushinando pa basta tempo caba. Loke a surgi awor ta fruto amargo di e maneho scondi for di vista di nos comunidad, di trata di atende e asunto lo menos posible na un manera explicito y habri, haciendo tambe loke ley internacional ta exigi di nos como pais, pero reclamando tambe loke tabatin mester pa atende e grupo di refugiado. Un di e medidanan tuma ta cu a ‘outsource’ henter e asunto cerca organizacionnan di exterior, cu no ta duna cara den comunidad. Awor ta bin resulta cu esey no a yuda pa gobierno keda sin cumpli cu cierto requisito indispensable den maneho di e grupo aki. Na mas cu un ocasion e medio aki a mustra riba e importancia pa atende e asunto di e indocumentadonan na un manera transparente. Nos critica tabata y ta keda cu gobierno, principalmente a traves di ministro encarga cu labor y integracion, ta promove un ‘de facto aministia general’ sin cu ta menciona e concepto aki y sin cu parlamento di Aruba asumi e responsabilidad di exigi cu algo asina no por sucede sin cu ta cana e caminda corecto, esun di legislacion adecua. Aparentemente ningun hende den parlamento, ni di banda gubernamental ni di oposicion, tin massha gana di toca e tema aki. Awor e asunto a subi caya toch y cada ken mester asumi nan responsabilidad.
Nos por comprende cu gobierno tin miedo cu atende henter e asunto ‘by the book’ manera Amnesty ta exigi, ta expone nos isla como un ‘paraiso pa refugiado’ y esey lo haci cu nos lo atrae problema hopi mas grandi ainda den futuro cercano. Esey sigur si nos mira e situacion actual na Venezuela, cu por desemboca den otro ola di migrante cu ta busca otro bida den region. Nos no por sconde pa e problema aki, pero mester ta claro tambe cu Aruba no por planea y ehecuta un programa di atencion na refugiado. Esun cu ta exigi esey di nos, nan pone placa pa haci esey posible. Awor mas cu nunca ta necesario tene frontera cu Venezuela cera, hermeticamente y pa tempo indefini.
