Manera Bon Dia Aruba a informa ayera riba su pagina di Facebook, fuentenan a indica na redaccion cu e actual director di Guarda Nos Costa, Richard Kramers su prueba di VDA (Veiligheidsdienst Aruba) a indica cu e no por sigui fungi como director di e departamento aki, segun investigacion di e Veiligheidonderzoek di VDA.
Un Veiligheidonderzoek di Seguridad Nacional di Aruba ta tuma na cuenta inteligencia hudicial, proces verbal di polis, participacion of apoyo den actividadnan peligroso di Estado, apoyo na organisacionnan peligroso pa Estado, comportamento y circunstancianan personal den un periodo di e ultimo 10 aña di bida di e persona en cuestion.
E proposito di e investigacion aki ta pa determina si e persona por cumpli fielmente cu su obligacionnan den e funcion den tur circunstancia; ademas tambe ta haci pruebanan medico y psicologico.
Di e forma aki ta evita cu por cuminsa cu un investigacion di seguridad mientras cu te ainda no tin garantia cu e persona en cuestion ta cumpli cu tur e rekisitonan pa su funcion.
Den caso di Kramers, redaccion di Bon Dia Aruba manera cu a ricibi e noticia aki a tuma contacto cu prome minister Evelyn-Wever Croes, minister di Husticia Rocco Tjon y minister di Integridad Ursell Arends pa asina puntra lo siguiente:
“Den cuadro di transparencia di Gabinete Wever-Croes II, lo laga un persona cu un decision negativo di VDA den su funcion como director? Kico ta e siguiente pasonan cu boso lo tuma?”
Te ciere di edicion aki, redactor di Bon Dia Aruba no a haya un contesta di nan, pero lo sigui informa comunidad.
