Rapport anual di Corte Comun ta indica cu e cantidad di caso a aumenta

Diabierna ultimo Corte Comun di Husticia di Aruba, Corsou, Sint Maarten, Boneiro, Sint Eustatius y Saba a presenta su rapport y cuenta anual. E rapport anual, cu tin como tema “Extranea lux, illuminatio interna” (Bista di pafo, Inspiracion pa paden), ta detaya diferente aspecto di e rol di Corte Comun.

Pa loke ta e cantidad di casonan, cual ta consisti di e cantidad di esnan cu ta drenta pa ser trata y e cantidad cu a ser finalisa, salida, ta dividi na prome instancia y apelacion.

Pa loke ta prome instancia, den 2023, e total di entrada di caso a aumenta cu 2%; di 36,544 pa 37,248 caso. E entrada ta aumenta for di 2021, pero e rapport ta remarca cu ainda e ta bou di e nivel di periodo prome di Covid (2018-2019).

E cantidad di casonan ta subiendo den e categorianan di derecho civil, 4%, y derecho penal, 5%. Den derecho administrativo tin un caida den e cantidad di caso, principalmente den e cantidad di casonan di impuesto na Corsou. Na 2023 tin un total di 37,943 caso finalisa. Esaki ta un aumento di 5%. Aki tambe salida ta subiendo mas den e categorianan di derecho civil cu 6% y derecho penal cu 5% y e salida den derecho administrativo ta baha cu 6%.

E aumento di salida den derecho civil ta principalmente pa motibo di e uso di capacidad adicional pa elimina e retraso di trabou.

Pa loke ta e Corte di apelacion, e rapport ta indica cu e total di entrada di caso di apelacion den 2023 ta 1,087, locual ta un caida di 5%. E entrada di casonan di derecho administrativo ta baha cu 26%, pero derecho civil ta subi levemente cu 1% y derecho penal ta subi cu 8%.

E salida di casonan di apelacion ta 1,221, un caida di 6%. E caida ta mayormente debi na e salida di casonan di impuesto na e localidadnan di BES y Corsou y e caida di salida di casonan di empleadonan publico na e localidadnan di Aruba y Corsou.

Na mita di 2023, e portal online pa casonan di impuesto a wordo implementa pa Aruba. E portal aki ta duna e partidonan di e proceso acceso digital na documentonan di un caso. Ademas di por haya y parti documentonan di ambos partinan y di e Corte, notificacionnan di progreso di e caso ta ser transmiti via e portal.

Esaki ta duna hopi beneficio pa e hende cu ta buscando husticia y e representante profesional di e partinan. Tur informacion di un caso ta na un luga. E metodo aki lo ser implementa despues na e otro dos localidad.

E entrega digital di dossier di derecho penal y impuesto pa apelacion na Hoge Raad ta sigui progresa. Tambe e sentencia di Hoge Raad ta ser manda digital na Corte pa distribucion. E manera di entrega digital ainda ta complica den su mayoria pa e Hoge Raad. P’esey na 2023 un proyecto conhunto a cuminsa pa e dossier yega mas lihe y si ta posible mas sigur na Hoge Raad.

Na final di 2023 e proyecto aki a progresa basta pa test y implementacion a tuma luga durante e prome mita di 2024. Esaki ta importante pa e tempo di proceso di apelacion: e ta mas lihe y mas eficiente.

E rapport ta sigui splica cu e progreso di casonan ta ser monitorea den e sistema di registracion di caso GEAR. Despues di un zitting, loke a wordo dicidi durante e zitting, a base di e rol, ta ser procesa den e sistema. Usuarionan ta indica cu e proceso di procesamento di e rol ta sinti slow y complica. A base di un proyecto cu varios usuario a participa aden, a desaroya un modulo nobo pa procesa e rol, y aworaki e ta mas lihe, efectivo y mas facil.

Den 2021 a tuma luga e prome conferencia di calidad den e historia Corte. Durante e conferencia aki cuatro sub-tema a wordo discuti den gruponan chikito: idioma den sala, rapidez di sentencia, e rol di e hues y garantia di calidad. Pa cada un di e temanan aki a haci recomendacion na e comision y e comision a acepta nan.

Na 2023, algun di e recomendacionnan aki a ser transforma den cambionan concreto den e organisacion. Hues- y empleadonan legal a organisa tayernan riba con pa skirbi den idioma cla y comprendible. Ademas, a establece regulacion pa e asignacion di caso na huesnan, a realisa inversion den reunionnan di hurisprudencia y ta analisando pa wak si ta posible pa logra gana tempo den e proceso primario cu traha mas inteligente.

Zomer di 2023, pa e resto di e recomendacionnan, a pidi un grupo di hues pa sigura cu e recomendacionnan tambe ta conduci na cambionan concreto den e manera di traha pa mehora calidad. E grupo aki ta consisti di huesnan cu ta traha den prome instancia y apelacion. Tur isla ta ser representa den e grupo aki.

Durante e di dos mita di 2023, trabounan a tuma luga riba formulacion di reglamentonan pa e varios ambitonan di derecho riba e disponibilidad di traductornan. E reglamentonan ta varia pa cada isla y pa categoria di derecho.

Despues cu e comision y coleganan di Corte a acepta e reglamentonan aki, implementacion lo a cuminsa na comienso di 2024. Esaki lo conduci na cambio den e manera di traha.

Despues e mesun paso lo tuma luga pa comunicadornan di prensa y e publicacion di sentencianan.

Na 2023 tabatin varios desaroyo cu tabatin influencia riba e formacion y composicion di e Corte na Aruba. A forma un Team pa Combati Criminalidad den derecho penal. Esaki ta nifica un extension di e team di derecho penal cu un hues adicional, hues-comisario y dos secretario di Corte. Ademas, e formacion y composicion di e sosten legal y administrativo a ser evalua.

Esaki a conduci na ofrece un salario mas apropia na algun secretario di Corte local y a permiti transicion di administracion pa sosten legal. Tambe, a establece e politica di promocion pa e sosten legal na 2023, cu—a base di un transicion—a crea espacio pa empleado cu ainda no ta cumpli cu e rekisitonan nobo di formacion, pa ser incorpora cu un schaal apropia.

Na Aruba pa algun tempo caba tin un portal online pa entrega di documentonan. Esaki a surgi durante e pandemia di COVID-19, ora cu e acceso na e edificio di Corte tabata limita. E meta tabata pa crea un posibilidad pa presenta casonan digitalmente na e Corte. Despues di un evaluacion profundo, a dicidi pa cera e portal na 2024. A resulta cu e proceso y e legislacion actual rond di e entregamento digital di documentonan ainda no tabata suficientemente cla pa trata documentonan di proceso digitalmente.

Despues di e proyecto grandi di mantencion na 2021, na Aruba a esforsa pa mantene e bon estado di e edificio, pa haci e mantencion chikito necesario anualmente. Tambe, a reemplasa e desknan pa sinta traha, pa mesanan na unda ta traha para. Esaki e rapport ta indica tin beneficio ergonomico y di salud y ta crea un postura di trabou mas dinamico di e personal.

Anualmente, e archivo ta wordo actualisa y e dossier ta ser limpia. Aña pasa e dossier di derecho penal di 2009 te cu 2013 a ser limpia y informacion importante a ser preserva y a usa e documentonan di seleccion basico.