(AP) – Artista di rap basa na Louisiana a declara su mes culpabel dialuna pa e rol cu el a hunga den crimen organisa den escala grandi unda a comete fraude di receta medico. E grupo aki a opera for di su cas di multi miyon dollar na Utah.
E rapper NBA YoungBoy, ken su nomber real ta Kentrell Gaulden, a drenta corte na Logan. Utah cu su cabes abao pa para responsabel pa su rol den e plan, KTVX-TV a reporta.
E rapper di 25 aña originalmente a keda acusa den Logan District Court cu 46 cargo relaciona cu e crimen acusa. Riba dialuna, el a declara su mes culpabel na dos instancia di fraude di identidad, dos instancia di falsificacion y 6 instancia di conducta farmaceutico fuera di ley. Gaulden a drenta un declaracion di “cero contienda” na e demas cargonan.
Como parti di e trato, Gaulden no lo cumpli un castigo den prizon na Utah. Na luga di esaki, lo reduci su cargonan y e lo ricibi un ordo di paga un boet di 25,000 dollar, segun e stacion di television a reporta.
Hues di districto Spencer Walsh a acepta suspende e sentencia di prizon mirando cu ta anticipa cu Gaulden lo cumpli 27 luna den prizon federal pa cargonan relaciona na un caso di Weber County, Utah. Despues di su libertad, Gaulden lo tin 5 aña di liberad supervisa.
“Esaki ta un tipo di caso unico unda tabatin varios hurisdiccion involucra ambos den e sistema estatal y federal,” e fiscal di estado Ronnie Keller a bisa. “E ta realmente un parti chikito di un wiel hopi mas grandi den e buskeda di yega na husticia.”
Gaulden tabata bibando na Utah bao detencion na cas despues di anteriormente involucra den un tiroteo cu a tuma luga den 2019 na Miami. Su mudansa pa Utah a bini como parti di un trato den 2021 den cual su abogadonan a argumenta cu “muda pa Utah lo mantene YoungBoy fuera di problema.”
Durante su audiencia dialuna, Walsh a bisa cu ta cla cu Gaulden ta un hoben talentoso. “Mi a mira hopi biaha unda bo tin hobennan cu ta yen di talento y potencial. Nan ta horta di e potencial aki ora cu realmente nan cuminsa bataya cu nan adiccionnan,” Walsh a bisa Gaulden, “Y mi no kier esey pa abo.”
Walsh a sigui bisando cu “mi ta sigur cu den bo futuro, na momento cu bo cumpli bo castigo federal, realmente bo por mira exito y tin un futuro briyante unda bo por yega e potencial completo di tur aspecto di bo bida. Mi ta desea bo persona e miho suerte, Mr. Gaulden.”
Gaulden, di Baton Rouge, Louisiana, tambe ta conoci como YoungBoy Never Broke Again y a logra 4 album riba posicion number 1 riba lista di Billboard 200 y un Top 10 hit riba Billboard Hot 100. Su musica ta inclui “38 Baby,” “Outside Today” y Tyler, The Creator su cantica “Wusyaname,” riba cual e ta participa conhuntamente cu Ty Dolla $ign. E colaboracion aki a logra un nominacion Grammy den 2022 pa Best Melodic Rap Performance.
