Rapper Lil Wayne ayera na Florida a wordo acusa di tin un arma di candela den man di un criminal condena, un ofensa federal cu ta carga un sentencia potencial di hasta 10 aña di prison.
Documentonan entrega den corte federal na Miami ta bisa cu e rapper, kende su nomber real ta Dwayne Michael Carter Jr., tabatin un arma y municion dia 23 di december di aña pasa, a pesar cu e tabata sa cu e tabatin e condena den su record.
Autoridadnan ta bisa cu e rapper di 38 aña di edad a reconoce di ta doño di e arma di candela, cubri di oro, despues cu a listra su ekipahe na su yegada na Miami abordo di un avion priva. Un orden di buskeda tabata bisa cu Carter a bisa investigadornan cu e arma tabata un regalo di Dia di Tata.
Abogado di Carter, Howard Srebnick, a bisa den un email cu tin preguntanan legal tocante si e puro posesion di un arma di candela den man di un criminal condena ken ta considera no-peligroso ta fit e definicion di un crimen.
“Carter ta acusa di posesion di un pistola cubri cu oro den su maleta riba un avion priva. No tin acusacion cu el a dispara, saca esaki, us’e of menasa di us’e,” Srebnick a bisa. “No tin acusacion cu e ta un persona peligroso.”
Investigadornan tambe a reporta cu a haya loke ta sospecha ta droga ilegal den e maleta, pero Carter no a ser acusa cu un ofensa di droga.
Un fecha inicial den corte pa e cargo di arma ta programa pa dia 11 di december na Miami.
E cargo ta bin di un condena di Carter pa arma na New York mas cu un decada atras, pa cual el a ricibi un sentencia di ocho luna den prison. Criminalnan condena ta prohibi bao ley federal di tin arma di candela.
Como Lil Wayne, Carter a bende mas di 120 miyon record, a gana cinco Grammy y cantidad di otro premio musical. E tin un cas na Miami Beach y ta CEO di su propio record label, Young Money Entertainment.
