(AP) — Rapper Kodak Black a ricibi sentencia di libertad condicional pa a abusa fisicamente di un adolescente femenino na un hotel di South Carolina.
Originalmente a acusa Black di violacion, pero a acepta un acuerdo y a declara su mes culpabel di abuso den prome grado na e corte di Florence County.
Black, kende su nomber legal ta Bill Kapri, ta enfrentando un sentencia di 10 aña di prison suspendi. E no mester bay den prison pa e cargo tanten cu e completa 18 luna condicional, segun medionan di comunicacion a reporta.
E victima den e caso a mira e declaracion online, y Black a papia cune. “Mi ta pidi disculpa cu esaki a sucede, y mi tin speransa cu nos por move bay dilanti”, el a bisa. Despues riba su cuenta di Twitter, Black a post cu e victima djis tabata kier pa e caso conclui, y ‘mi no mester duna ningun placa’.
E abuso a tuma luga na 2016, tempo cu Black tabata na Florence pa un presentacion. E adolescente a bisa cu e rapper a atak’e na un camber di hotel na Florence despues di e show, mordiendo su nek y su pecho y continuando hasta despues cu el a bis’e pa stop, autoridadnan a bisa.
E adolescente a reporta e atake na un enfermera di scol, kende a yama polis, investigadornan a bisa.
Black tabatin un sentencia di 3 aña den prison federal pa falsifica documentonan usa pa cumpra arma na un tienda di arma na Miami, cual a keda pordona pa presidente Donald Trump riba su ultimo dia na su cargo. El a cumpli alrededor di mita di su sentencia.
Abogado di Black, Bradford Cohen, anteriormente tabata un participante den show di Trump, ‘Celebrity Apprentice’. E pordon ta nota cu Kodak Black a paga pa buki di muchanan di scol, suministronan pa créche, y cuminda pa esnan den necesidad, y a haci un donacion di $50mil pa restaurantnan den su ciudad natal di Pompano Beach, Florida.
Black a bende mas di 30 miyon single desde 2014, y tin varios single certifica multiplatino y platino, incluyendo ‘Zeze’, ‘No Flockin’’ y ‘Roll in Peace’.
