Cu e cancion, ‘When I Was Younger,’ rapper Jon Tarifa, hunto cu cantante y escritor Darren Gardner, ta ilustra con fascinante e mente di un mucha ta, unda nada ta strob’e pa persevera y explora mundo.
E impulso pa explora teritorio desconoci a hiba Darren, cu originalmente ta di Port Elizabeth, Sur Africa, te na Hulanda, unda na 2016 el a muda pa forma su bida cu su pareha Elsa. Na Hulanda el a haya e oportunidad di sigui desaroya su talento musical, unda el a traha cu diferente artista di tanda manera DJ Martin Garrix y ganado di e premio Grammy Chris Henderson.
Tambe Darren a skirbi y aregla composicionnan musical pa, entre otro, Berget Lewis, y ZO Gospel Choir. Darren ta considera e talentoso cantante y areglista Curasoleño, Stanley Clementina, como su mentor, kende a introdusi’e na e industria musical Hulandes. Di e manera aki, Darren a keda expone na e diferente influencia musical crioyo y a desaroya un conexion bunita cu nos islanan.
Ken ta Darren Gardner?
Darren Gardner a studia musica clasico na Universidad di Pretoria na Sur Africa, unda el a specialisa den Vocalisacion Clasico y Ingenieria di Zonido, pero su amor pa musica ta bin di cas. Darren a lanta den un famia cu a expone na artistanan manera, the Beatles, Nat King Cole, Dionne Warwick, Mariah Carey, Lauryn Hill, y asta compositornan clasico manera Mozart y Beethoven. Consecuentemente, Darren su musica ta satura pa influencianan di pop, R&B y jazz. Como estudiante, Darren a descubri su pasion pa arte ora el a forma parti di varios coro di scol y a presenta riba diferente tarima.
Despues di a forma parti di algun banda, Darren a opta pa continua como solista y continua traha riba su carera como cantante y escritor. Na 2020, Darren a participa na Holland Got Talent y duna un presentacion impresionante ku ‘I Wish’ di Stevie Wonder, unda el a canta y utilisa diferente instrumento hunto cu un mashin di drum pa construi e ritmo di e cantica.
Colaboracion cu Jon Tarifa
Cu e proyecto aki, Darren a colabora cu e talentoso rapper Albanes, Jon Tarifa, kende el a conoce na Hulanda, a pone su toke unico riba e bunita concepto musical. E videoclip di ‘When I was Younger’ a keda dirigi pa ItsmeKenny na Hulanda y Jon Tarifa a edita e producto final.
Darren a traha e concepto y melodia di ‘When I was Younger’ y a pone e base pa e areglo, pa despues laga productor Wesley Nuis finalisa e cantica.
Jon Tarifa no ta un artista desconoci na Corsou, despues cu el a score un hit na 2011 cu su debut titula “So Right’. Tambe el a keda invita e aña ey pa presenta na Curaçao North Sea Jazz Festival cu cantante Levi Silvanie. Actualmente, Jon ta biba na Bali, Indonesia, y e ta den e etapanan final di finalisa su album nobo, cu ta carga cu yen vibracion isleño.
Plannan pa futuro
Actualmente Darren ta trahando riba un EP cu e ta spera di lansa na 2023, pero ya el a duna nos un ñapa cu ‘When I was Younger’. “Tempo nos tabata jong, nos tur a soña y a aspira pa un dia bira algo grandi,” Darren ta splica. E cantica ta papia netamente di e nostalgia ey y con e mucha di paden ta biba den nos tur. Actualmente Darren ta trahando riba su siguiente piesa cu guitarista y productor Wesley Nuis, y ta spera di publica esaki na cuminsamento di 2023.
