Randolph Oduber di Aruba ta e representante nobo di baseball masculino den WBSC Athletes Commission, mientras cu Bruno Motroni di Argentina ta e miembro nobo di softball femenino.
Comision di Atleta di WBSC (World Baseball Softball Confedereation) – pa duna conseho na asuntonan relevante di baseball y softball – recientemente a completa eleccion y awo, cu un complemento full di miembro, ta cla pa yuda globalisa baseball, softball y baseball5, y sigura cu atletanan rond mundo hunga nan rol den e proceso, specialmente cu un aña Olimpico emocionante nos dilanti.
“Mi ta anticipa pa e Comision di Atleta hunga un rol clave den 2020, un aña Olimpico”, Maria Soto, co-presidente di e comision, a bisa. “Mi ta kere nos por traha hunto y yuda e reinstitucion di baseball y softball den programa Olimpico permanentemente.”
Ricardo Fraccari, presidente di WBSC, a tweet un potret cu Oduber, Soto y Motroni cu e leyenda ‘combersando cu nos atletanan representante Maria, Bruno, Randolph’.
E miembronan ademas di Soto (Venezuela; softball femenino) y Justin Huber (Australia; baseball masculino) kende tambe ta miembro di hunta ehecutivo di WBSC, e otro miembronan di comision di atleta ta Ashley Stephenson (Canada; Women’s Baseball), Erika Polidori (Canada; Women’s Softball), Pauline Prade (Francia; Softball femenino), Bruno Motroni (Argentina; Softball masculino) and Randolph Oduber (Hulanda; baseball masculino).
Eleccion di Oduber como representante di baseball masculino, cual a tuma luga durante Premier 12 di ultimo luna, a completa e Comision di Atleta. Un nativo di Aruba, Oduber ta outfielder kende a pasa seis temporada den organisacion di Washington Nationals, a hunga den Hoofdklasse Hulandes pa Neptunus Rotterdam, y actualmente ta riba roster di Lincoln Saltdogs di e independiente American Association.
Na juni, Motroni – catcher y capitan di team pa Argentina pa campeonato mundial – a ser elegi como representante di softball masculino durante e campeonato mundial WBSC masculino di softball na Republica Checo. Ambos miembro tabata hunto cu Soto na e Congreso y reunion di Hunta Ehecutivo di WBSC luna pasa.
