E hoben Ginelly Quandt kende ta traha como boluntario den fundacion Rancho ta masha comprometi pa trece un cara nobo y un nomber positivo di e bario aki. E ta para tras di e proyecto di “Adopta Un Hanchi”.
E siman aki nan a realisa e trabou di pintamento di borchinan cu e nomber di e hanchinan cu lo yuda embeyece mas e bario, y tambe lo guia e turistanan y local pa bishita y cera conoci cu historia di e hanchinan aki.
E ta kere cu e hendenan no mester tin miedo pa bishita Rancho. E ta contra cu Rancho a haya un mal nomber y te hasta tin hende cu ta sigui mira e bario aki den luz negativo y peligroso.
Pero Ginelly a bisa cu den realidad Rancho no ta un bario peligroso. E ta convenci di esey, ya cu si no tabata asina fundacion Rancho no ta bin cu un proyecto manera Adopta Un Hanchi. “Esaki ta un di e proyectonan cu ta bay laga fundacion Rancho bisa kico nos kier logra cu e bario aki”, el a declara.
E meta di e proyecto aki ta pa duna e hanchinan den Rancho nan debido atencion, entre nan esunnan pa midi nan balor historico, y asina documenta e historia di e hanchinan aki. Tambe pa informa e publico tocante e historia y futuro di e hanchinan aki.
Nan mester bin urgentemente cu e proyecto aki, ya cu e hanchinan di rancho ta mustra descuida pa motibo di sushi y poco iluminacion pober. Esaki ta haci cu lamentablemente e hanchinan aki cu un gran balor historico-cultural, no ta atractivo pa e bishitantenan.
E ta haya cu e ta un forma pa Stichting Rancho por duna conoce e cultura di e bario aki. “Laga e hendenan di afo experiencia Rancho”, el a bisa. Fundacion Rancho ta trahando hunto cu Feria Social y CEDE Aruba den e prome fase di e proyecto aki. El a laga sa cu bou e capa di Feria Social cu ta cuminsa den luna aki di augustus ta wordo envolvi e hobennan coach y boluntarionan cu lo colabora cu e proyecto aki.
Expresion artistico
Pero e trabou aki no ta uno facil. Tambe el a yuda den e proyecto pa pinta un mural den pleno curason di Rancho pa e hendenan di e mesun bario por a expresa nan mes den forma artistico. Sinembargo e mural aki a wordo daña cu acto di vandalismo, pero pa e hoben Ginelly Quandt, esaki no ta niun problema. El a bisa cu e hendenan ta keda pinta, pero nan satisfaccion mas grandi ta cu nan a trahe.
Ademas e mural afortunadamente no a wordo daña full. Tambe el a ripara cu tin graffitinan den bario cu ta un expresion creativo den Rancho.
