Diabierna 10 di november a bira conoci dos anuncio importante relaciona cu naturalesa y medio ambiente na Aruba, ta trata di expansion di areanan protegi bou convenio di Ramsar na Aruba. Esaki fuera di Spaans Lagoen, awo ta inclui e sistema di Western Wetlands, cual ta consisti di cinco saliña, Zuidkust, Westpunt y Oostpunt.

Durante e simposio titula “Nature-Based Solutions (NBS)” organisa door di Fundacion Parke Nacional Aruba y Dutch Caribbean Nature Alliance, a pone enfasis ariba e urgencia di iniciativanan pa preservacion di naturalesa y alabes e compromiso di Aruba pa conserva naturalesa mediante ley y maneho.

E enfoke di e evento aki tabata pa expande conocemento y accion riba solucionnan cu ta encera procesonan natural pa aborda desafionan ambiental entre e paisnan den Caribe Hulandes.

Ramsar ta un reconocemento internacional pa e balor natural di areanan tanto riba tera como marino. Den futuro un “Island Round Marine Park” tambe lo ta parti di maneho di areanan marino. Contrario na Ramsar, e designacion di un parke marino rond di Aruba ta un manera di reconoce den legislacion nacional e necesidad pa usa e areanan aki den un manera sostenibel.

Aunke e reconocemento di Ramsar no ta prescribi regulacionnan specifico, e ta stimula Aruba pa intensifica su esfuersonan di conservacion. Un ehempel ta Spaans Lagoen cu a ricibi reconocemento di Ramsar den e decada di aña 80, pero designa formalmente como area protegi den ley a sucede na 2017.

Status di Ramsar tin como meta pa proteha e areanan aki sin interveni cu actividadnan economico, enfatisando reduccion di daño y restauracion di naturalesa den caso di daño cu ta inevitabel.

Sinembargo, riba rednan social tin algun discusion riba e tema aki, mirando cu un di e tradicionnan di Aruba ta piscamento sea cant’i lama of otro luga, un tradicion cu ta bin tumando luga for di basta aña y ainda algun persona ta eherce esaki. Nan tambe ta bin treciendo dilanti nan punto di bista, unda nan no ta di acuerdo cu e convenio di Ramsar indicando cu esaki ta limita espacionan pa nan por sigui pisca, “kitando nos derecho y nos libertad di pisca.”

Tambe tin otro comentarionan, manera “mi kier wak ken ta bay stop mi di pisca y busca mi seekat, cocolishi of calco,” y “custumber di nos grandinan ya no tin balor,” comparti pa usuarionan di Facebook, maske e maneho ta basa riba e conservacion di naturalesa.

Bon Dia Aruba a busca mas informacion riba e topico aki pa asina informa un poco mas y a haya cu dia 13 di november a publica riba e website www.ramsar.org cu Reino Hulandes a agrega cuater “Luga di Ramsar” na Aruba na Lista di Lansamento di Importancia Internacional, y a extende e luganan existente riba e isla, cu ta un pais cu ta forma parti di Reino.

East Point (luga number 2525 riba e lista)

Un sitio marino cu ta cubri e puntanan oriental di e isla, ta contene un plataforma di piedra calki, caña seco di awa, un lago di awa dushi, duna, playa, y awa marino hopi hundo y profundo. E awanan hopi hundo ta sirbi como refugio pa seis sorto di dolfijn. Mientras tanto mas leu den lama, unda e awa ta mas hundo, a observa mas especie.

Costa Zuid (luga number 2526)
 Cubriendo un estrecho di 19 kilometer riba e costa zuid di leeward di Aruba, ta considera e area mas biodiverso di e pais. Tin e boske di mangrove mas grandi di e isla, coral di seagrass, playa, rifnan di coral, y e cadena principal di rif di e isla. E combinacion di habitatnan aki ta duna luganan di reproduccion, cria y luganan esencial pa diferente sorto di animal manera ‘terns’, tres sorto di turtuga di lama, diesdos tipo di mamifero di lama, hopi coral, pisca y spons.

West Point (luga number 2527)

Esaki ta forma pa habitat varia: playanan, duna di santo, tera di piedra calki, saliñanan, rifnan di coral, coralnan di seagrass, y awanan marino hopi hundo y profundo. E playanan ta luga pa cuater sorto di turtuga di lama (leatherback, hawksbill, loggerhead and green turtles) pone nan neishi y e sitio aki ta un luga importante di parada pa hopi sorto di pisca migratorio cu ta busca alimento.

Western Wetlands (luga number 2528)

Esaki ta consisti di cinco luga di Aruba conoci como saliñas, wetlands ta costa cu no ta bay cu fluho di marea unda awa di lama por combina sporadicamente cu awa dushi pa forma un ambiente cu salinidadnan variante.

Entre tanto, Spanish Lagoon (luga number 198), un di e bahianan natural mas grandi den Caribe, a keda extendi di 90 pa 259 hectar pa inclui e area di recoleccion di awa di e wetland central. E lago ta rondia pa plachi di lodo di marea y mangrovenan bien desaroya y tin un entrada di costa estrecho di mas o menos dos kilometro largo y entre 200 y 500 meter di hancho. E sitio ta duna un habitat di cria importante pa hopi sorto di especie incluyendo pisca di rif, crustaceonan y parhanan.

Den e simposio, tambe a remarca e importancia di cooperacion entre fronteranan den Caribe Hulandes pa conservacion marino. Minister Arends su ambicion ta pa Aruba yega na un “ABC-wide” Hope Spot na 2024, colaborando cu Mission Blue pa proteha e lama comparti entre Aruba, Boneiro, y Corsou. E palabranan di Sylvia Earle, presidente di Mission Blue: “No water, no life; No blue, no green” a ser menciona cual ta enfatisa e rol fundamental di awa pa mantene bida riba tera.

Ta importante pa destaca di lo cual por a compronde for di comunidad di piscado cu mester di mas informacion tocante e topico aki pa asina ey nan por ta mas involucra y educa riba loke ta trata conservacion y preservacion den areanan menciona aki.