Buro Prevencion di Desaster a confirma cu un investigacion mester saca afo di si e tarballs y patches riba nos beachnan realmente ta bin for di e lek na Trinidad.

Bon Dia Aruba a trece esaki dilanti caba y ayera parlamentario Donny Rasmijn (AVP) a declara den nos corant cu tin un investigacion pa determina e origen. Despues riba medionan social diferente persona a critica nos, hasta cu atakenan personal riba un redactor cu no a skirbi e articulonan menciona, comosifuera nos a inventa e storia.

Sinembargo ayera e hefe suplente di Buro Prevencion di Desaster (Bureau Rampenbestrijding) a confirma na 24ora.com cu berdad nan ta investigando si e azeta ta di Petrotrin, e refineria na Trinidad & Tobago cu a causa e derame.

Manera nos a trece dilanti, e ta pasa frecuentemente cu ora tin un derame, tankernan den e area ta probecha pa limpia bahul etc. pa tin menos chens di wordo descubri.

Di otro banda for expertonan Bon Dia Aruba ta compronde cu calculacionnan ta mustra cu ta plausibel cu e azeta ta di Petrotrin teniendo cuenta cu e coriente. Den pasado un rapport a sali di despues di un investigacion profundo di e corientenan den e area y rond nos isla y tambe teniendo cuenta biento y e peso di azeta. E calculacion cu ta den e rapport aki ainda por uza pa determina con lihe un derame ta yega nos isla.

Prome punto ta cu ora a bisa e siman aki cu e coriente lo cambia pa west, esaki ta un observacion straño como cu un coriente no ta caminda di un pa otro dia. Nos ta papiando di corientenan grandi (golfstroom), asina e expertonan ta indica. Mancha sea otro forma di derama casi semper ta yega nos costa banda Noord pasobra na e banda aki por mira cu diferente corientenan ta bay direccion di e costa aki.

Den e prome 4 luna di Aruba ta conoce un coriente principal for di oost, cu ta origina den e waf di San Nicolas. Parti zuid e coriente ta bay direccion lama, pues e azeta lo no yega e parti aki, pero lo sigui bay segun e coriente direccion west. Teniendo cu e velocidad cu e azeta por biaha den lama (nudo), si lo calcula esaki riba 0,8 nudo, el a tuma 30 dia pa yega di Trinidad pa Aruba. Esaki ta cuadra cu e dia (23 di april) cu Petrotrin a notifica cu azeta a lek den lama. Sinembargo si lo calcula e velocidad riba 1,2 nudo, lo a tuma 18 dia.

E autoridadnan a bisa cu nan tabata na altura di e derame y tabata monitor e situacion desde april caba. Pregunta ta keda: dicon no a cuminsa cu e preparacion segun plannan di prevencion ta prescribi: alerta instancianan, NGO’s y comunidad y asina por ehempel forma teamnan di boluntarionan den e 1 luna of 18 dia prome cu e azeta a yega nos costanan.

Manera Bon Dia Aruba a trece caba, prome minister mes como presidente di e team di prevencion di desaster a bisa nos cu nan no tabata suficiente prepara riba e derame. Y cu esaki tabata un les pa nan.