Rampenbureau: Otro luna lo entrega gastonan di calamidad azeta

Algun siman pasa Rampenbureau a informa Bon Dia cu derame di azeta na nos costanan no ta categorisa manera un crisis mas. Hefe suplente di e departamento Rino Hermans ta bisa nos cu 25 di augustus tur departamentonan lo entrega nan gastonan na gobierno pa recobra daño y perhuicio.

“No tin cifra ainda,” sr. Hermans a contesta Bon Dia ora nos a puntra si tin algun indicacion di kico tur a wordo gasta caba den e operacionnan aki. E dienstnan ta entrega e kostenplaatje dia 25 di augustus anto for di eynan Bureau ta traha e rapport pa entrega na gobierno. Parke Arikok tambe ta bay entrega un claim.
Nos a puntra un boluntario tambe cu a gasta hopi placa den material pa haci limpi, si a registra gastonan y lo pidi pa un claim. E boluntario ta bisa nos cu: “Niun hende no a bisa nos cu nos por registra gasto.” E mesun boluntario aki a conta nos cu den un grupo nan mester por a yega 1000 florin di gasto na saco y mas material pa trata cu e calamidad aki.

Proceso di medio ambiente
Riba 12 di juni nos a publica cu e situacion di derame di azeta na nos costanan ainda tabata un calamidad. Dos dia despues Rampenbureau ta baha esaki di intensivo pa pasivo. Nan a informa nos algun dia despues di esey cu nan lo sigui cu un limpiesa di monitor te cu 20 di juli pero ta continua cu un ‘langdurige monitor’ di nos costanan pasobra: “Experiencia ta bisa cu 6/7 siman no ta suficiente, bo tin cu keda monitor pasobra bo no sa cuanto tin den e awa. Si yega asina leu cu por ehempel tres luna ta pasa y no ta haya tarballs, e ora ta yega fin na e operacion akinan.”
Nos redaccion a tuma nota di un persona cu a post riba Facebook cu e ta buscando hemchi gratis pasobra e ta haciendo beach limpi di e azeta na nos costanan panort.
Nos a purba tuma contacto cu e persona aki pa un reaccion pero no a logra. For di locual nos ta compronde, tin hopi area cu ta sushi ainda pero manera cu nos a informa caba, segun Rampenbureau no mester mishi cu esaki a base di recomendacion y escogencia di expertonan di exterior (Oil Spill Response Limited di Fort Lauderdale). Esaki sr. Hermans a splica nos algun siman pasa, enfatisando e tempo ey tambe awor cu: “crudo ta un producto natural y naturalesa mes lo ahusta su proceso di medio ambiente.”