Den cuadro di apertura di aña escolar 2019-2020, e conocido Linguista y Papiamentista Ramon Todd Dandaré ta cumpli su hubileo di 50 aña den enseñansa.

Cinco decada di trayectoria profesional como docente, y como linguista hopi liga cu investigacion, estudio y desaroyo di nos idioma Papiamento. Pero, fundamentalmente, Todd Dandaré a hiba un lucha pa Papiamento por a bira lenga di instruccion den nos sistema di enseñansa.

Inicio
Na 1965 Todd Dandaré a cuminsa studia Spaño na Universidad di Amsterdan y den e Alma Mater aki el a conoce un docente influyente den su carera como papiamentista. Pero no solamente pa Todd Dandaré, sino tambe pa Joyce Pereira, kendenan hunto ta celebra e aña aki nan Hubileo di Oro den enseñansa, recordando cu dia 15 di augustus 1969 nan a cuminsa traha na Colegio Arubano, Joyce como docente di Hulandes y Ramon como docente di Spaño.

E academico Antiano Raul Römer tabata e persona cu den realidad a pone Todd Dandaré riba e caminda di estudio di Papiamento. E tabata duna Papiamento como materia secundario (bijvak) na Universidad di Amsterdam.

“El a yena nos cu idea y cu tur posibilidad cu tin cu Papiamento tambe”, Todd Dandaré ta bisa.

E Linguista Todd Dandaré ta sigura cu ya caba for di Hulanda e tabata pensa riba Papiamento na scol. Den e añanan 1967-68 tabatin revista -tempo di e constelacion Antiano- cu a bira escenario pa bin cu discusion tocante Papiamento na scol, y esaki tabata apasiona Ramon su idea. Na 1969 Todd Dandaré a caba su estudio di Spaño MO-B, cu cual e por a duna les na tur nivel di enseñansa secundario; e ta manera un HBO-Master aworaki.

Cu e titulo aki di docente di Spaño otorga na Universidad di Amsterdam, Todd Dandaré a bin dicidido pa pone su conocemento na disposicion di e hubentud di Aruba. Ora cu dia 15 di augustus 50 aña pasa Todd Dandaré a drenta Colegio, meneer Sjef Tjon-En-Fa (kende anteriormente tabata su docente di Spaño na Colegio Arubano) a bira su ‘mentor’, y el a cuminsa gui’e den su proceso di adaptacion, ya cu el a haya for di Brugklas te cu klas 4 di HBS como docente di Spaño.

E no por lubida cu su prome aña na Colegio tabata e miho aña den enseñansa pa semper den su bida. Na fin di añanan 60, el a haya un klas 4B di HBS (specialisa den matematica, fisica, kimica y biologia) masha interesante. Fabio Moreta, Jaime Falconi, Richard Goeloe (d.f.m), Victor Loefstop, Johnny Winterdaal, entre otro, tabata algun di e studiantenan di e klas interesante ey. E hobennan inteligente y masha critico aki tabata bibando den un ambiente di hopi cambio y transformacion cultural, politico, economico etc.

Tabata tempo di e Revolucion Cubano, y tambe e paisnan colonisa di mundo a cuminsa lucha pa nan independencia. E guera di Vietnam tabata den su furor, pero tambe e rebeldia di e hubentud, sigur esun Mericano, contra e guera ey, expresa, entre otro, den e Festival di Woodstock, inspira pa libertad, amor y paz, cu casualmente a cuminsa net e mesun dia cu Todd Dandaré y Pereira a cuminsa traha na Colegio.

Tur e desaroyo y ambiente mundial aki Todd Dandaré tabata discuti cu su alumnonan den su lesnan di Spaño. E ta sinti su mes masha honra y satisfecho como docente di por a contribui den e proceso di enseñansa di hopi profesional actual, penshona y hasta defunto na Aruba. E ta lamenta cu despues poco poco e sentido critico a cuminsa bay perdi.

Papiamento y enseñansa
E tempo aya tambe tabatin cierto desaroyo riba tereno di Papiamento cu a conduci cu na 1973 Todd Dandaré a tuma e decision di bay specialisa den Linguistica General, pa asina e por a investiga, profundisa y siña conoce Papiamento miho. El a bay haci un Master den Linguistica General na Universidad del Valle na Cali, Colombia.

Dos aña despues cu el a logra su Master, den tempo ainda di constelacion Antiano, el a haya un nombramento na Departamento di Enseñansa como linguista y el a set up Instituto Linguistico Antiano (ILA) cu despues, na 1986, ora cu Aruba a adkiri su Status Aparte, a bira IDILA (Instituto di Lenga y Literatura Arubano). El a traha den e instituto aki hunto cu Pedro Velasquez, Mario Dijkhoff y otro persona.

Esaki no a kita cu Todd Dandaré a keda cu su vocacion como docente, dunando les di Spaño y di Papiamento pa y na diferente instancia; y tambe el a participa den diferente comision di enseñansa y di Papiamento. Na añanan 90 nan a cuminsa cu e cursonan di Papiamento, pero prome cu esaki nan a yega di organisa, entre otro, curso di Papiamento pa e miembronan di prensa.

Diferente desaroyo a tuma luga prome cu e aña escolar aki, Scol Arubano Multilingual (SAM) a cuminsa pa tur scol, caminda ta uza Papiamento como idioma di instruccion den enseñansa. Un echo cu sigur lo keda uno historico den desaroyo y reconocemento di nos lenga materno. Sinembargo, Todd Dandaré ta haya cu e proceso aki ta un proceso cu ta bin ta canando for di masha hopi aña pasa.

E ta trece dilanti cu ora cu a bin cu e idea di EPB, caminda bo ta bay haya studiante cu problema cu Hulandes, ya caba Papiamento mester a bira un sorto di instrumento linguistico pa facilita e proceso di enseñansa na e tipo di scol ey. E ta haya cu pa medio di e lucha sindical di e maestronan den VLA, despues SIMAR, Papiamento por a haya su luga den enseñansa. Sinembargo, e ta haya cu mester duna merito tambe na e docentenan di Scol Special, ya cu nan a dicidi di cuminsa duna les na Papiamento riba nan mes den e decada di añanan 70 di siglo pasa, entre otro cu colaboracion di Todd Dandaré mes.

Mirando e desaroyo aki, a dicidi cu mester di preparacion di e docentenan pa duna les na Papiamento. Todd Dandaré ta corda cu Lydia Emerencia di IPA a tuma contacto cune como Director di IDILA pa cuminsa cu un curso sikiera di tres grado, loke nan tabata yama antes LO Papiamento. Tabata un curso pa e docentenan di Scol Special y pa onsnan cu lo a bay cuminsa duna Papiamento na EPB. Asina nan a cuminsa cu e prome curso di Papiamento specificamente pa enseñansa na 1993, sigui pa e cursonan di Di dos Grado, Bachelor y Master, cu keto bay ta andando na IPA (Master cu e valioso cooperacion di Universidad di Corsou).

Y ainda falta
E linguista ta haya cu ainda tin un caminda largo pa cana y cu e bataya pa fortalece Papiamento ta sigui. E ta haya cu for di añanan 70, e lucha a cuminsa pa mustra for di prome instancia caba cu nos tin problema cu idioma Hulandes como lenga di instruccion den nos enseñansa. Kiermen, mester cambia e didactica y e metodologia, pa asina nos propio idioma por bay den enseñansa. Pasobra, asina nos muchanan por siña miho, saliendo for di loke nan tin caba y no for di loke nan no tin ainda.

E aña aki cu ta implementa Papiamento oficialmente den enseñansa, cuminsando den Scol Preparatorio, ta un prome paso importante. E ta haya cu si no introduci Papiamento den enseñansa, dificilmente lo por tin buki -cu ta un di e criticanan mas fuerte-, pero e ta haya cu mester crea e necesidad pa bin cu buki, y crea un proceso y un desaroyo pa logra esaki. E por imagina su mes cu aki 10 aña nos por ta hopi mas leu cu e proceso aki di introduccion y implementacion di Papiamento como lenga di instruccion den nos enseñansa.

Den su hubileo di 50 aña como docente, Linguista Todd Dandaré su conseho pa e generacion nobo y actual di maestro ta cu, na prome luga, bo mester ta sigur di bo mes y kere den bo mes. Cu esaki e kier men: Kere den bo bida, den bo humanidad, den bo medio ambiente, den bo hendenan, den bo cultura y su expresionnan, den bo idioma. E di dos conseho ta cu ora bo prepara y duna bo lesnan, ‘hacie cu amor’, pensando riba e muchanan, bo studiantenan. Pero tambe, hacie buscando excelencia y buscando e manera di haci bo trabou como docente, y kico otro cu bo haci, lo miho posibel. Y no rindi nunca!