Ayera mainta den un conferencia di prensa di Cuerpo di Polis di Aruba a wordo treci informacion valioso pa comunidad di loke ta trata e lamentabel caso di e turista Canades cu a wordo agredi dia 26 di december ultimo pa cuatro persona local.

Ramon Arnhem ken ta fungi como korpschef di Cuerpo di Polis di Aruba a menciona cu e dia aki un acto di maltrato severo a tuma luga na banda di tereno di waf rond di 8or y mey di anochi.

Un turista di crucero a wordo maltrata despues cu el a mira cu un accidente a tuma luga, e persona tabata na e luga pa e por haci entrega di e auto cu el a huur pa asina por recore e isla cu su famia y subi bek riba barco crucero Voyager of the Seas di e cual nan tabata pasahero.

Ora e persona a bay wak kico a pasa y si tur cos tabata bon cu esnan cu tabata envolvi den accidente, e hendenan den auto a sali y agredi e turista di un manera severo, el a haya diferente fractura den su cara y su famia a keda traumatisa door di loke a sucede “esaki ta teribel pa e y su famia” Arnhem a señala y a sigura tambe cu nan ta convivi cu e victima y su famia.

Despues di esaki, el a informa cu for di dia cu esaki a tuma luga Cuerpo di Polis y Ministerio Publico a traha duro pa asina resolve e caso aki na unda nan a logra detene cuater persona cu ta trata di dos hende homber y dos hende muhe.

“Mi kier gradici cada colega cu a traha duro pa resultado aki, mi kier enfatisa lo siguiente, actonan di violencia ta inaceptabel na Aruba, esaki no ta pasa na Aruba, no contra local ni contra turista, Aruba ta conoci como One Happy Island, nos isla ta esun mas sigur den nos region y nos kier pa esey keda asina y no s lo haci tur lo posibel pa mantene esey asina,” Arnhem a bisa.

Alabes, el a reitera cu tur hende cu ta comete actonan di violencia ta bay keda deteni pa polis y nan lo wordo presenta na Corte di Husticia pa nan responsabilisa nan mes pa nan actonan cometi.

For di 30 di december Cuerpo di Polis a haci e prome detencion di un di e personanan sospechoso den e caso aki, esaki a tuma luga na un cas na Pos Chiquito caminda un dama a wordo deteni y un auto a wordo confisca.

Dialuna 2 di januari departamento di Recherche Oranjestad a bay na un cas na Jan Flemming y a detene e di dos sospechoso cu ta e homber di inicialnan T. E. A. B. naci na Aruba di 24 aña.

Dia 4 di januari departamento di recherche a detene e di tres sospechoso na mesun cas na Jan Flemming. Ta trata di e homber inicialnan C.M.E. B. naci na Aruba di 21 aña, e cual ta ruman di e prome sospechoso.

Mesora e sospechosonan a wordo hiba warda pendiente di mas investigacion, di e cuater persona aki tambe a wordo informa cu un di nan a sali liber caba, ta trata di e mama e cual a keda deteni hunto cu su yiu muhe cu ta e doño di e auto cu a wordo usa den incidente aki.

Na comienso di e caso, a bin dilanti un otro informacion tocante con e suceso a tuma luga segun loke por a saca di e prome melding, di esaki vocero di Cuerpo di Polis Lito Lacle a splica cu despues ora investigacion ta tuma luga eynan por saca afo ki informacion tin, despues di e interogacion di e victima a bin sali e historia completo di loke realmente a sucede.

Tambe, el a bisa cu e tarea di Cuerpo Policial ta pa zorg pa e investigacion den e caso aki y di otronan mas lo wordo haci mas completo cu ta posibel pa asina e por wordo treci pa Ministerio Publico dilanti hues, “na hues ta keda pa determina si en berdad ta duna mas castigo cu ta posibel, pero nos como Cuerpo Policial no por tolera esaki pa Pais Aruba,” Lacle a sigura.

Pa loke ta trata e victima, Lacle tambe a bisa cu nan tin contacto cu e persona aki y su famia conhuntamente cu ATA cu ta e instancia encarga pa monitor con prensa internacional ta reacciona, den caso aki prensa Canades no a pone mucho atencion den esaki “lo cual ta positivo pa Aruba, nos ta tarea tabata pa keda den contacto cu e victima cada bes cu tabatin un detencion,” el a bisa.

Tocante e motibo di e agresion, Lacle a comenta cu probablemente e sospechosonan a sinti cu e turista a graba nan den nan accident y esey a causa e reaccion di agresion contra e, lo cual tabata un mal interpretacion na unda e victima tabata yamando un car rental pa puntra unda e mester a bay pa entrega e auto cu el a huur e dia ey.

E dos sospechoso ruman cu fam di inicial ‘B’ manera vocero a splica, ta conoci caba pa departamento di husticia.