Un startup aerospacial Hapones, funda pa un ex- maverick di internet, exitosamente a manda un raket chikito den espacio diasabra, birando asina e prome raket Hapones desaroya comercialmente cu a alcansa orbita.
Interstellar Technology Inc. a bisa cu e raket MOMO-3, sin tripulacion, a excede 100km di haltura prome cu cay den Ocean Pacifico. El a wordo lansa for di e sitio di test di e compania, den e pueblo di Taiki, na e isla principal nort di Hapon, Hokkaido, y a bula pa 10 minuut.
“Nos a demostra cu nos raket, desaroya cu hopi partinan disponibel comercialmente, ta capaz di alcansa espacio”, CEO di Interstellar Technologies, Takahiro Inagawa, a bisa den un conferencia di prensa for di Hokkaido.
E raket, como 10m largo y 50cm di diameter, ta pisa como 1 ton. E ta capaz di carga 20kg, pero actualmente no tin e habilidad pa manda esaki den orbita.
E compania, funda na 2013 pa entrepreneur Takafumi Horie, kende tabata un ex- co- presidente di Livedoor, tin como meta pa desaroya raket comercial economico pa hiba satelite den espacio. Horie a expresa expectativanan halto pa su negoshi nobo.
“Mi speransa ta cu hopi fabricante y trahado di satelite lo bin aki pa uni nos”, el a bisa.
E lansamento ta parti di un tendencia nacional creciente den negoshi espacial, unda Hapon a cay tras di competencia global, lidera pa startup Mericano manera SpaceX di Elon Musk.
E exito di diasabra a yega despues di dos fayo na 2017 y 2018.
