Den bista di RAIZ, aña 2019 lo keda recorda como e aña di Resistencia den cual e poblacion di Aruba ningun momento a perde for di bista e cambionan cu nan a pidi na 2017. E mensahe di nos hendenan a keda firme durante henter e aña cu a pasa, cu e nivel di debe nacional no ta aceptabel, e nivel di gasto di gobierno no ta aceptabel, integridad mester wordo fortifica, corupcion mester wordo combati, mester pone un fin na e influencia toxico di politica riba nos comunidad, mester duna atencion adecuado pa un grupo grandi cu tin menos recurso, mester proteha nos naturalesa y nos futuro .

Den 2019 nos tur por a cuminsa sinti cada biaha mas y mas e impacto di e mega debe. Cada florin cu bay na paga debe ta un florin menos pa nos hendenan di menos recurso, of un florin menos pa garantisa siguridad. Nos hendenan a mustra cu di nos banda nos lo aporta na e esfuerso comun pa baha e debe aki. Pero na mes momento nos hendenan ta exigi cu Gobierno tambe mester cuminsa duna di su parti. E deficit mas grandi na Aruba ta un deficit moral unda Gobernantenan ta pidi e pueblo pa cooperacion, sacrificio y entrega, mientras cu e mesun Gobierno aki ta permiti proyectonan dudoso tuma luga bou di su maneho. Un deficit moral ta ora cu esunnan na mando, esunnan cu mester percura pa un bon maneho di nan pais, no ta sinti e necesidad pa duna cuenta na e pueblo cu nan mester sostene na luga di ignora.

E falta di transparencia aki ya a demostra nos caba cu e ta sirbi solamente pa fomenta y permiti corupcion, hustamente na momento cu no por permiti mas deroche di placa. RAIZ ta keda pidi na tur minister den nos ministerraad pa nan para keto un rato y pensa si e falta di transparencia cu tin den varios proyectonan di Gobierno ta promove integridad of ta juist habri caminda pa corupcion. Mescos cu den 2018 y 2019 RAIZ lo keda trece proyectonan cuestionabel na atencion di publico en general y particularmente na Parlamento, cu e speransa cu nan lo haci nan trabou.

Durante 2019 mientras cu nos pueblo ta uni den un esfuerso pa atende cu e debe nacional, cada bes por a tende mas relato y lesa mas rapport den cual ta cuestiona e nivel di corupcion riba nos isla. Pero locual pa nos di RAIZ a sobresali den 2019 ta cu nos hendenan a mustra claramente cu nan tin ningun intencion di baha cabes pa corupcion y tampoco pa politica di division, ni di Gobierno ni di parti di oposicion. RAIZ ta reconoce cu mientras cu Gobierno a falta pa mustra seriedad den bahamento di su gastonan, nos hendenan si a sali for di diferente skina y nan a organisa nan mes den diferente forma pa sali na defensa di nos balornan.

Rechasando politica di division nos hendenan a bin hunto y a traha hunto den diferente grupo sin duna importancia na colornan politico. Nos hende nan ta cla y capaz pa supera nos diferencianan pa logra e reto aki? Cu orguyo RAIZ por a mira den 2019 con e spirito Arubiano y sentido di fraternidad a vence riba politica tradicional. Centenares di hende y decenas di grupo a sali pa yuda y duna un man. Nos hendenan a sali na defensa di nos principionan den diferente forma, algun a sali na defensa di naturalesa, otronan a organisa asistencia na animalnan, otronan a organisa marcha y protestanan abierto contra proyectonan y plannan no-transparente y cuestionabel. Nos hendenan a uni y a traha a base boluntario y anonimo. E dia lo yega cu nan mensahe positivo di union lo surpasa e mensahenan di division. P’esey RAIZ kier probecha di ocasion aki pa gradici tur esunnan cu riba propio iniciativa y boluntariamente a lanta para den e periodo dificil aki pa yuda esunnan mas fragil den nos comunidad. Nos ta gradici tur persona – y tur instancia – un gran cantidad di instancia – cu a scoge pa no para warda riba Gobierno sino tuma accion nan mes.

Aruba no ban baha cabes, ban keda insisti, persisti y sigui e ehempel di nos grandinan. Nos grandinan a graba den nos e storia di un isla chikito pero habita pa hendenan balente cu ora nan cera cabes nan semper por enfrenta y surpasa tur tipo di contratiempo. Nos Rubianonan ta conoci pa loke e Hulandesnan ta yama “zelfredzaamheid”. Mensahe di RAIZ ta cu no ta e pueblo mester sigui ehempel di politiconan. Al contrario, e politiconan lo haci bon di sigui e ehempel di nos pueblo. E pueblo di Aruba ta un coalicion di hendenan cu a bin di tur skina di mundo pa biba cu otro den paz. Pa e motibo aki RAIZ a duna e coalicion actual tur espacio pa nan por traha na bienestar general. Cu disciplina y hopi pasenshi RAIZ a evita debatenan cu por a bruha tera of causa discordia.

Den 2020 RAIZ lo sigui duna e coalicion den Gobierno espacio, pero na mes momento ta exigi pa nan traha na bienestar general. “Keep them Honest!”. Nos lo sigui tene un bista skerpi riba Gobierno y su proyectonan. Tin varios proyecto andando pa cual ya nos a expresa nos preocupacion. Nos lo sigui investiga esakinan y nos lo sigui exigi transparencia y integridad den tur proyecto. Te ainda Gobierno por a sconde tras di e falta di transparencia pasobra falta di informacion ta haci nos tarea dificil, pero nos lo no laga los. E proyecto principal cu nos kier mira for di Gobierno e aña aki ta un plan concreto pa baha tur su gastonan, particularmente e gasto di personal. RAIZ t’ey pa keda!