Nos a sigui e segundo tanda di e reunion cu a cuminsa 31 di juli 2020 cu hopi atencion. Loke Minister Lopez-Tromp a wordo forsa di haci pa motibo di un posibel mocion di desconfiansa, esta di para den parlamento y presenta e situacion di corupcion den su ministerio, ta algo cu RAiZ lo exigi di tur minister di e proximo gabinete. No ta bay warda riba un mocion di desconfiansa pa pone e ministernan basha’bou.

Na 2017 RAiZ a indica cu Aruba mester un Minister di Integridad. E motibo pa esaki ta cu corupcion ta tuma luga na nivel di minister bay abou, pues no por atende cu integridad solamente na nivel di ambtenaren. No por spera di un hoofd van dienst pa e ta un whistleblower si riba su cabes e tin un hefe (minister) cu por ta corupto. Ta comprendibel cu ningun hende lo risca saca nan cabes pa despues nan perde nan trabou.

 

Y ayera por a nota cu e miedo aki ta real. Por a nota e forma con miembronan di parlamento a trata minister Lopez-Tromp. En vez di aprecio pa un minister cu ta alerta publico pa casonan di corupcion y falta di integridad, e minister a wordo interoga y bagatelisa. En bez di a puntra e minister kico parlamento por haci pa yud’e den su esfuerso pa combati corupcion den su ministerio, parlamentarionan a exigi di e minister pa e entrega na parlamento (!) pruebanan cual tur hende sa cu e minister no por comparti libremente. Na mes momento ta parce cu ningun parlamentario a wordo sorprendi tampoco pa e cantidad di casonan cu e minister a presenta.

 

Ban pensa bon ta kico a pasa ayera nochi, esta cu un minister di Aruba den pleno parlamento y den bista publico a conta con el a hereda un ministerio infecta pa corupcion. E prome reaccion di parlamento ta cu e problema di corupcion ta un problema di ‘percepcion’. Ta con por spera di ambtenaarnan pa nan bin dilanti ora cu un minister mes ta wordo trata di e forma aki ora e denuncia corupcion?

 

Den futuro tur minister lo wordo yama dos biaha pa aña pa bin Parlamento y duna un relato publico di e ‘state of affairs’ pa loke ta trata integridad y combatimento di corupcion den nan ministerio. No por ta asina cu ministernan ta acumula casonan di corupcion y ta colecta evidencia, pero ta warda esakinan den lachi pa uza ora segun cu ta cumbini nan of no. Door di exigi ministernan duna cuenta na publico, e pueblo ta haya e oportunidad pa mira kico ta pasando.  Pa RAiZ esaki ta parti integral di cualkier acuerdo di coalicion. Sea e minister mes ta duna cuenta na parlamento of e Minister di Integridad ta haci esaki a base di trabou e.o. di Bureau Integriteit Aruba y Ombudsman pa asina e dos instancianan aki no bira tiger sin djente, cu ta traha rapport pa yena lachi.

 

Ta berguensa pa scucha den parlamento di Aruba un lista di cosnan cu a “fix” y a purba “fix” den un solo ministerio. Ta penoso con e parlamentarionan a mustra di no ta interesa pa laga e minister papia libremente y a logra rek e tempo di forma cu e minister a bin na palabra despues di 12’or di anochi, ora cu pueblo ya a bay  drumi. Na final a cera e anochi cu un gesto simbolico, un mocion pa e minister entrega keho na ministerio publico. E desconfiansa cu POR a expresa riba nan propio minister a bolter y a crea mas desconfiansa den nos parlamento.