Recientemente a keda anuncia cu Griffie der Staten tin cuater empleado nobo ta drenta den funcion pa yuda fortalece e trabou di Griffie. E anuncio aki a causa algun conmocion den comunidad mirando cu un di e empleadonan nobo ta ruman di actual parlamentario y lider di fraccion RAIZ, Misha Raymond.

Apart di esaki, fraccion RAIZ a contrata un fractie medewerker cu tambe ta relaciona, ruman homber, di e parlamentario y lider di fraccion. Esaki tambe a causa reaccion y comentarionan den comunidad y hopi ta cuestiona e nombramento.

Practica di ‘friends and family’ den gobierno ta existi pa hopi aña. Cu e anuncionan recien cu ta envolve “family” di e actual parlamentario y lider di fraccion RAIZ ta lanta e pregunta si RAIZ tambe ta den e practica aki.

Reaccion cu a yega na mesa di redaccion di Bon Dia Aruba ta cuestiona fuertemente e nombramento di tanto e ruman homber di parlamentario Raymond como fractie medewerker di RAIZ como e nombramento di e ruman muhe como Hefe di Servicio di Informacion den Parlamento.

“Wel wel su ruman homber ta sali for di prizon pa estafa di credit card y ta bira fractie medewerker sin bin trabao (spook ambtenaar). Awor e ruman muhe ta wordo nombra na parlamento sin cu nunca parlamento a saca peticion di solicitud pa trahador. Wel si Ursell por a nombra su mesun ruman na belasting dienst, awor nos sa pakico no por para pa integridad contra Glenbert, Besaril, Romero, Briesen y tur otro Tristo ora Ursell bisa “nos no ta nan” paso RAIZ ta pior cu nan. “This is the new generation” nos prome despues pueblo!” e reaccion ta indica.

Otro medionan di comunicacion tambe a trece dilanti e punto di posible practica di “friends and family” den partido RAIZ cu e nombramentonan aki. Despues di algun dia di discusion riba e tema, parlamentario Raymond mes a dicidi di bin dilanti y adresa e situacion.

Den un video publica ariba su pagina di Facebook oficial, Raymond a splica tocante con e proceso a cana pa loke ta e nombramento di su ruman homber como fractie medewerker.

El a indica cu na 2021 RAIZ a habri entrevistanan di solicitud pa hende por solicita como fractie medeweker. El a sigui splcia cu tabatin un vision caba kico e partido tabata kier y nan tabata kier un hende pa comunicacion y un hende cu un background legal, cu e tabatin un estudio legal pa yuda cu e diferente leynan cu nan tabata encontra cune.

Raymond a splica cu e seleccion di un persona pa e parti di comunicacion a bay un tiki mas lihe, pasobra nan a haya un hende cu tabata cualifica pa e posicion. Pero pa e parti legal e proceso a tarda mas.

El a indica cu durante e prome ronda di solicitacion nan a entrevista cinco hende, den cual su ruman homber no a participa pa motibo cu nan no a lague participa. “Nos kier a kita apariencia di interes den conflicto,” el a remarca.

E parlamentario a splica cu despues di e proceso di e prome ronda di entrevista nan a acerca dos candidato pa e posicion di fractie medewerker den e area legal y a conitnua cu e pasonan necesario pa firma di un contract, cual contract tabata e mesun cos pa tur dos candidato.

Pero na momento cu a yama pa firma contract tur dos candidato a retira y tur dos a duna como motibo pa retira cu no tin seguridad di empleo. “Ora bo ta drenta pa traha pa un fraccion, esey no ta sigura cu bo tin un trabou despues cu gobierno no ta exisiti mas, bo no sa si e fraccion ta bin back of con e ta bay mustra, bo no sa si bo tin trabou. Ambos candidato a bisa cu nan no ta bay tuma e riesgo ey,” el a indica.

Na mesun momento el a reitera cu fractie medewerker ta un funcion di un stichting y no funcion di ambtenaar. Esaki ta nifica cu como trahado di un stichting e persona no ta crece den salario, tin cierto beneficio cu e trahado no ta haya. “E ta un trabou unda bo ta bin, bo ta apoya e fraccion pero e ta hopi limita den kico bo ta haya un, den salario y dos, den con bo por crece trahando den e fraccion.

Despues cu tur dos candidato a retira a RAIZ a bolbe habri e solicitacion y a haya cuater hende cu a solicita, pero cu no tabatin e experiencia ni diploma corecto pa loke nan tabata buscando. Esaki ta e caso unda su ruman homber, cu a studia ley na Den Haag y cu segun e parlamentario ta señala, tin un experiencia amplio, a puntra si e por participa pa yuda den e fraccion.

Raymond a indica cu na momento cu nan a sinta den fraccion pa delibera si esaki ta un escogencia, mirando cu e por wordo politics y ta trece su riesgonan cune, a opta pa bisa si toch pasobra “e fraccion mester a sigui funciona.”

“El a yuda nos pa un tempo basta largo mirando kico tur tabatin riba mesa y e parti unda e tin experiencia y compara temanan legal di otro pais a yuda nos y beneficia nos inmensamente,” el a resalta.

Pa loke ta trata e nombramento di su ruman muhe como Hefe di Servicio di Infromacion den parlamento, parlamentario Raymond a splica cu parlamento a habri vacatura y cu e “no tin ni arte ni parte den con esaki ta bay”.

Segun el a indica e vacatura aki ta uno cu tin hopi tempo habri y na momento cu su ruman a aplica el a bisele cu tin un chens grandi cu e no lo haya e trabou simplemente pa e hecho cu e ta un parlamentario.

El a splica cu e proceso a cana su caminda y a dura lunanan largo y tabata envolve entrevista cu DRH, cu un comision selectivo y dos parlamentario, Mansur y Tevreden. Despues DRH ta manda e candidato pa Conseho di Minister y Conseho di Minister ta dicidi si e candidato ta haya e trabou.

“Niun caminda Misha ta dicidi, pasobra esaki ta un proceso cu tabata fuera di mi alcanse,” el a enaftisa.

Politica di nepotismo, hiba un politica pa primeramente beneficia amigo y famia, cu puesto den gobierno y entidad estatal, den proyecto pa gobierno y entidad estatal, den destaho, o falta di, pa suministro di material y servicio na gobierno y entidad estatal, no ta algo di awor, e ta algo di tur tempo. Y no mester lubida cu e tema di nepotismo, y su efecto, a yega di bin dilanti caba.