Di dos LOB riba conseho DNM menos urgente

E partido cu ta bogando pa derechonan di naturalesa a entrega un peticion na prome minister Evelyn Wever-Croes (MEP) pa asina haya sa si gobierno a duna Repsol aprobacion pa dump material di desperdicio den nos awanan. Ademas ta pidi minister Otmar Oduber (POR) pa haya conseho di DNM.

Partido Raiz despues di a tuma nota di varios articulonan cu Bon Dia a publica tocante e boramento den Aruba su Economic Exclusive Zone (EEZ) pa exploracion di gas, a dicidi di haci un peticion den cuadro di transparencia (Landsverordening Openbaarheid van Bestuur) na gobierno.

Indicacion cu ta bay dump likido den lama

Segun Ursell Arends di Raiz, despues cu a tuma nota di e articulonan aki nan a dicidi di bay studia e Environmental Health and Social Impact Assessment cu Repsol y a entrega gobierno tocante e exploracion, unda ta indica cu e compania claramente lo bay dump lodo di Push and Dump (PAD). Fuera di esaki, e partido a haya sa, manera Bon Dia tabata mustrando caba, cu e compania lo tin intencion di dump materialnan basa riba azeta sintetico, cual ta ilegal segun e Petroleumbesluit y Petroleumverordening.

En caso cu a duna un aprobacion pa tira likido di desperdicio den nos parti di lama, sr. Arends a splica cu nan lo kier sa ken ta responsabel pa controla esaki, pa motibo cu esaki no ta pasando mirando cu ‘e legislacion di petroleo na Aruba ta un di esun mas estricto na mundo’. Sinembargo e lider di e partido jong ta remarca cu si no bin un control di parti di departamentonan, no por garantisa cu Repsol ta sigui e leynan y regulacionnan local.

Sr. Arends a indica cu nan a trece esaki dilanti mirando cu Sociedad di Ingenieronan di Aruba (SIA) a trece nan preocupacionnan den Bon Dia y otro prensa pa e manera con e proyecto di boramento di gas ta andando y despues di consulta cu nan a dicidi pues di tuma accion. “Nos ta trece nos punto dilanti pasobra si un organisacion manera SIA cu ta conta cu conocemento profesional tin duda riba algo, dicon no trece claridad? Na final di dia si bo trece polucion den nos awanan bo ta daña bida marino y bo ta pone nos economia den peliger por medio di pone nos beachnan den peliger.”

Mester menciona cu minister di infrastructura sr. Oduber a indica den pasado cu e unico aprobacion cu e operadornan di e boramento a hayanan ta pa dump awa di toilet den lama cu ta pasa su proceso debido di sanacion. Esaki den cuadro di capitulo 5 di Petroleumbesluit ta e unico excepcion cu gobierno por duna encuanto deshaci di desperdicio den lama.

‘Conseho aplicabel pa otro area di naturalesa’

Banda di esaki na mesun momento Raiz a entrega un peticion di LOB na minister di infrastructura y medio ambiente mirando cu su persona a expresa den pasado cu ta stop e proyecto di Isla di Oro a base di un conseho di DNM.

E peticion ta basa riba e echo cu a uza un conseho di DNM pa stop un proyecto mientras Raiz ta di opinion despues di haci un investigacion cu nan lo por aplica e conseho aki tambe pa otro proyecto den area di Savaneta, cual segun su persona ta hayando atencion di NGOs ultimo tempo pa e construccionnan supuestamente ilegal riba un sitio cu ta considera area di naturalesa.

“Di 2016 caba nos por a wak cu ta trahando riba un proyecto similar na esun di Isla di Oro na un sitio cu segun nos research no tin e permisonan necesario pa opera un boutique hotel manera e ta operando y fuera di esey di e documentonan cu tin na Kadaster y DOW por conclui cu e desaroyo aki ta ilegal.”

Segun sr. Arends e director di DOW lo tabata bringando pa stop e proyecto aki desde 2016. El a expresa cu e unico minister cu tabata apoya e proyecto aki tabata sr. Oduber kende tabata minister di turismo antes, ‘p’esey nos kier a wak si ta midi cu dos midi of si e mesun conseho ta aplicabel pa otro areanan di naturalesa cu Aruba mester proteha’.

Sr. Arends no tin duda cu sr. Oduber lo cumpli cu e peticion aki mirando cu e ultimo biaha e minister a contesta e peticion pa trece claridad riba Isla di Oro ‘den tempo record’ pues mester duna elogio pa e transparencia aunke no tabata contene tur e informacion. Riba e peticion pa prome minister e no ta kere esaki lo bay ignora tampoco mirando cu sra. Wever-Croes ‘ta minister di integridad tambe’.

Reaccion pendiente

Bon Dia a tuma contacto cu e persona encarga cu e area na Savaneta cu sr. Arends ta menciona pa un reaccion, pero el a expresa na nos cu nan lo ta preparando un declaracion encuanto loke a publica riba medionan social. Nos no a haya un declaracion oficial, pero si e persona encarga a duna nos un splicacion amplio riba e aspectonan di conservacion cu nan ta ehecutando. Nos lo raporta riba esaki den nos proximo edicion.