Den un carta manda ayera pa Prome Minister di Aruba, Movimiento RAIZ ta expresa duda encuanto integridad cu mester tin den e proyecto Port City, cu ta e proyecto di desaroyo comercial di e area di waf cu no lo pertenece na e area portuario mas. E partido politico sin representacion parlamentario ta bisa den nan carta cu nan ta considera integridad un rekisito y balor principal den gobernacion, unda ta importante pa actua di forma preventivo contra posibel corupcion.

E organisacion ta menciona como punto di preocupacion e maneho di nombramento, den cual nan ta detecta cierto posibilidad di existencia di nepotismo. Esaki tanto den departamentonan di gobierno, entidadnan subsidia y den hunta di comisario di empresanan estatal, unda ta nombra, segun e partido, un cantidad di hende hopi cerca di e ministro y partidonan den gobierno.

Raiz ta haya cu mester para y evita e nepotismo señala, y ta opina cu mester yega na nombramento a base di “cualificacion, profesionalismo y integridad.” Seguidamente ta argumenta cu mientras ta necesario pa introduci reglanan di “Good Governance y Good Corporate Governance pa yuda preveni conflicto di interes,” ta mantene e opinion cu gobierno mester actua, awor caba, pa asina no keda pega den anticipacion di e reglanan menciona.

Caso specifico Port City.
Como caso specifico unda e organisacion ta expresa su preocupacion ta e Hunta di Comisario di APA NV, y e proyecto ‘Port City’, cu ta desaroya den colaboracion cu e ministro encarga cu Turismo, Salubridad Publico y Deporte y otro instancianan. Segun e carta, e proyecto ta encera un inversion di US$ 550 miyon, di cual 500 miyon ta bin di inversionista y contratista priva, cu un duracion di 10 aña.

Segun Raiz, a tuma nota cu dos representante den Hunta di Comisario di APA NV lo ta involucra den e investigacion encuanto otorgamento di tereno andando, conoci bao di e nomber ‘Avestruz’. Ademas ta observa cu lo tin nombramento den e hunta cu “ta duna indicacion di nepotismo.”

Considerando lo anterior, y cu tanto e investigacion den e caso Avestruz como e proyecto Port City ta encera ‘real estate’ y cu gobierno segun e organisacion tin e deber di actua den forma preventivo contra eventual corupcion y conflicto di interes, e organisacion ta haci un peticion na Prome Ministro Wever-Croes pa para e proyecto Port City temporalmente, pa controla y revisa e decisionnan di e Hunta di Comisario di APA NV. Tambe Raiz ta enfatisa cu ta respeta e proceso hudicial y ta reconoce cu sospechosonan “no necesariamente ta culpabel di actonan castigabel.” Sin embargo ta considera cu den cuadro di integridad gubernamental, accion a base di e informacion treci dilanti ta sumamente necesario.