Awor ta e momento pa nos pais Aruba cuminsa un era nobo. E ora a yega pa nos pueblo, hunto cu Gobierno di Aruba, cuminsa prepara diferente plataforma nacional pa encurasha y stimula nos economia cu pilarnan economico nobo pa nos futuro generacionnan.

Ora ta papia di Nos Pueblo, esaki ta encera: e clase trahado, e comerciantenan, sindicatonan, ATA, ATIA, AHATA, ATSA y tur otro Stakeholdersnan importante pa Aruba. Apesar cu nos tin hopi profesional aki na Aruba, ainda nos por logra uni forsa pa traha na bienestar di nos isla. Con dificil ta pa compronde e simpel echo cu si nos tur como pueblo traha den union, nos tur lo progresa hunto.

Turismo lo keda e pilar mas grandi y importante di Aruba, pero e crisis cu e Coronavirus aki a ocasiona, a sacudi nos tur for di soño. Nos a realisa con fragil nos isla ta si nos sigui depende solamente di Turismo.

Como ciudadanonan di e pais aki, nos mester ta cla pa hiba e Aruba Nobo aki den e bon direccion. Con? Tumando decisionnan clave manera:

  1. Establece e Moratoruim pa Hotels y Condominiums;
  2. Inventarisa e cantidad di acomodacionnan di AirBNB (y similar) pa por analisa e mercado actual prome cu dicidi con pa sigui desaroya e sector turistico na un forma sostenibel;
  3. Otorga proyectonan grandi di construccion na companianan local pa garantisa cu e placa por keda drey den nos economia. Dunando trabou na nos subcontractornan legal via e.o. Kamer van Koophandel Aruba, Departamento di Impuesto Aruba, Departamento di Integracion, Maneho y Admision di Stranhero (DIMAS) y Banco di Seguro Social Aruba (SvB Aruba) nos ta proteha e sector y desaroyo di nos economia.
  4. Establece e cooperacion (samenwerking) entre departamentonan di Gobierno pa por haci comparacion (“matching”) di informacion y crea un database (inventario digital) representativo y accesibel.

Den e dianan aki nos por a tende diferente comerciante chikito y grandi ta comparti nan punto di bista encuanto e situacion di e crisis y entregamento di salario di ambtenaarnan. Di otro banda nos tin e sindicatonan vociferando nan opinion tocante e tema aki y Gobierno di Aruba indicando cu ya tin mas o menos 37.000 hende cu a perde trabou den e sector hotelero. Esaki ta un cifra global ya cu Gobierno di Aruba no tin un lista al caso y al dia cu el a trece dilanti pa demostra pueblo con e cifra di 37.000 aki a wordo calcula.

Un ehempel con esaki mester wordo presenta: di e 37.000 hendenan aki, 10.000 hende ta procedente di sector hotelero (empleadonan di hotel, Casino, servicionan cu ta wordo “outsourced” pa companianan di manpower manera p.e. houseskeeping, pool attendants, gardening, construction, engineering etc.) Nos tin mas of menos entre 400 pa 450 Taxi vergunninghouders, 200 Autobus vergunninghouders, 300 T en O vergunninghouders, 100 Beachvergunning…. y asina nos por afirma e 37.000 hende.